“La Sorbona” fue kreada en 1253 kon la inisiativa del rey Louis IX, para estudiantes ke dezeavan estudiar teolojia. Despues kon el konfesor del rey, Robert de Sorbon ke le dio su nombre, se desidio ke esta institusion se va dedikar a los elevos ke no tenian paras i ke kerian ambezarsen teolojia. Kon esta vizion se konstruyo la baza de la mas prestijioza universidad del mundo. En poko tiempo La Sorbona, kon su kalidad de ensenyar, se izo un sentro para los eruditos i intelektuales de Evropa. Personajes famozos komo Descartes, Pierre i Marie Curie, Lavoisier, Simone de Beauvoir, Jean Paul Sartre i munchos otros estudiaron en esta universidad i su reputasion pujo mundialmente.
Kon la enerjia intelektual ke avia en akel tiempo, en el deredor de la universitad, se empeso a konstruir munchos monumentos prestijiozos favorizando la aktividad intelektual. Oy este distrito se yama el “Cartier Latin”. Kon la Sorbona ke se yama en mizmo tiempo la Universidad de Paris, avia una evolusion muy grande en la sivdad. Kon esta influensia se empeso a konsiderar Paris komo la kapital de Fransia.
Durante La Edad Media (siglos 13, 14, 15) La Sorbona aksepto estudiantes proves i rikos sin diskriminasion de famiya i de payiz. El punto importante era el nivel intelektual. Asi La Sorbona tuvo la fama de ser una universidad de igualdad i de moralidad. En el siglo 15, la Universidad de Paris (La Sorbona) era konsiderada el mijor sentro kultural i sientifiko de Evropa kon 20.000 estudiantes. En mizmo tiempo kon su kalidad i kon la rikeza de sus bibliotekas fue un sentro de umanizmo.
En 1622, kon la ayuda del Kardinal Richelieu, elevo de la universidad, La Sorbona fue rekonstruida i engrandesida. Kon el siglo de Luzes (siglo 18), la perioda ke los filozofos i los intelektuales ke trokavan sus ideas para adelantar la siensia, la universidad se sekularizo. Kon el progreso de la siensia, empeso una ekspansion mueva del pensamiento kritiko i filozofiko en Evropa. En 1896, Napoleon kreo 5 fakultades: teolojia, siensia, letras, derecho i medisina.
Esta Universidad, en su tiempo, por su prestijio akedemiko, fue el lugar ande Pierre de Coubertin, en 1892, propozo de azer un festival de “Djugos Olimpikos” ke se aksepto en 1894 i en 1896 los primeros “Djugos Olimpikos” modernos empesaron en Atena.
Durante los siglos 12-18 La Sorbona fue una de las mas prestijiozas universitades de Evropa endjuntos kon Bolonya, Oxford, Cambridge, Salamanca, Montpellier i Toulouse.
