The Brutalist, un filmo istoriko ande Adrien Brody esta djugando el rolo de un arkitekto judio ungaro gano diez nominasiones por el Oskar. Las kategorias prensipales del mijor filmo son direktor, aktor prensipal para Brody, senario orijinal, segunda aktris para Felicity Jones i segundo aktor para Guy Pearce. El filmo tambien fue nominado en las kategorias de muzika orijinal (por el lavoro del kompositor judio britaniko Daniel Blumberg), sinematografia, edision i plano de produksion.
Dirijido por Brady Corbet, de 36 anyos, filmado en Ungria, el filmo se esta enfokando en los detalyos de la eksperiensia de los imigrantes judios. The Brutalist fue muy alavado en esta sezon de premios.
Brody, ke save ungaro es uno de los favoritos en la kategoria del mijor aktor. El aktor es ijo de un padre judio i una madre artista ungara. Brody tambien gano premio en la mezma kategoria en 2002 por enterpretar un sovrebiviente del Olokosto, en el filmo El Pianisto. Jones, ke no es judia, enterpreto la mujer del aktor. En el filmo The Brutalist, Jones es una ungara konvertida al judaizmo. Pearce enterpreto un industrial ke tiene opiniones sinistras sovre los judios i los imigrantes.
The Brutalist no es el solo filmo judio sovre el Olokosto ke resivyo atansion en los premios. A Real Pain, ke tiene komo sujeto dos primos judios ke estan aziendo un viaje a Polonya para komemorar la muerte de sus abuela sovrebiviente, resivio dos nominasiones: segundo aktor para Kieran Culkin i orijinal senario para el senaristo, direktor i protagonisto del filmo, ke es Jesse Eisenberg. Eisenberg bazo el filmo en su propia eksperiensia de relasion kon la erensia judia polaka de su famiya; Culkin, ke no es judio, es el grande favorito para ganar el premio del segundo aktor.
El 5 de septiembre, un dokumentario sovre la kriza de los rehenes en los Djugos Olimpikos de Munich de 1972 i el masakro de la delegasion atletika de Israel por el grupo terroristo palestiniano, Septiembre Negro, fue nominado por el mijor senario orijinal.
El filmo biografiko de Bob Dylan, A Complete Unknown gano ocho nominasiones. El aktor prensipal Timothée Chalamet, ke es de una famiya judia i ke kanta komo Dylan, fue nominado komo kandidato, tambien los segundo aktores Edward Norton i Melissa Barbaro. El filmo tambien resivio nominasiones por mijor direktor, kostum, muzika i senario.
En la kategoría de la mijor artista prensipal, la artista judia Mikey Madison gano una nominasion por el rolo de una stripper i lavorante seksual de los imigrantes rusos en Anora.
El artisto judio, Jeremy Strong en el filmo The Apprentice fue nominado komo segundo aktor. El filmo esta aziendo la kritika de Trump. Sebastian Stan ke esta djugando el rolo de Trump fue nominado komo aktor prensipal.
El produktor judio, Marc Platt fue nominado komo kandidato porke su filmo Wicked fue nominado komo el mijor filmo. El kompozitor judio, Stephen Schwartz fue nominado en el ramo de la muzika orijinal.
