Kijimos konoser diferentes kulturas. Por esto izimos un program para ir a Rusya. Rusya es un paiz muy grande; tiene tiyerras i en la Evropa i en Asia. Aryento de las sivdades bile renkontrimos diferentes kulturas. Por egzempiyo, Moskova i St. Petersburg estavan komo dos diferentes paizes. Moskova estava komo sivdad i la kapital de Rusya ma St. Petersburg paresiya mizmo komo una sivdad de Evropa. Kuando arivimos a Moskova, el program ya estava pronto. Komo deshimos las validjaz al otel Cosmos ande mos estavamos kedando, empesimos al tur de la Plasa Ruvya. Aki entrimos de la puerta ande se topa el Muzeo de Istorya. Mos salyo enfrente una plasa muy grande. Solo de ver mos enkantimos. A la derecha, la tomba de Lenin, detras de la tomba la pared del palasyo de Kremlin, enfrente la katedral St. Vasil. Salyendo de esta plasa aviya el sentro komersyal ke se yama GUM. Las botikas i el arkitektura estavan muy enteresante. Aryento de 3 diyas en Moskova kaminimos el palasyo de Kremlin, el teatro de Bolshoy, la kaye ke es serrada al trafiko ke se yama Arbat, i la guerta ke se yama Gorki. Un parko muy grande. Aryento aviya pisina kon jetes de agua, lokantas, lunapark ets. Mos asentimos i bevimos bira. No vos vash a kreyer, la bira era Efes Pilsen. Mas de esto kaminimos los estasyones de metro, estavan di ke parese muzeos. De Moskova pasimos a St. Petersburg kon avion. Kuando arivimos en un supito se troko todo. Aki paresiya una sivdad de Iskandinaviya. Komo Sueza, Finland, Estonia o Letonia. I aki tambien las kayes estavan muy grandes. La mas ke se konose era Nevski Prospekt. El otel estava en esta kaye. La Katedral ke se yama Kazan i St. Isac estavan en este bulevar. A la fin de este kaye se topa el muzeo ke se yama Hermitaj. Antes era aki el palasyo de los Chares.
La Gastronomiya tambien es enteresante. La supa ke se yama Borsh, la gayna ke se aze i se yama Kievski, el Havyari ke se konose por el mundo entero. Komo kada vez, komo el sujeto es las salatas del mundo, vos kontare la salata spesyal ke se yama Salat Rus. Esta salata se envento en los anyos 1860 en Moskova ande aviya un restorante se yamava Hermitaj i el Shef era Lucien Oliver. En kurto tiempo se konosyo en el mundo entero i se amo.
Materyales
3 Patatas eskaldadas i kortadas en kubos
1 Karota eskaldada i kortada en kubos
1 Kupa de chay de bizelya eskaldadas
6-7 trushi de kornishon kortadas chikos komo kubos
Para la Sos
3 Kucharas de supa de Mayonez
2 Kucharas de supa de yogurt
Sal
Aparejar
Los materyales de ariva se mete aryento de un chini ondo. Ensima se mete la sos i se karishtereya i ansi se puede komer. Si keresh, se kome komo salata al lado de las komidas, si keresh komo mezelik, si keresh al lado del Shnitzel komo garnitur, o si keresh aryento de un sandvich de sosis.
