Kreo ke esto empleando el mizmo titolo para pueder eskrivir sovre diferentes sujetos kada semana. Es martes a la noche ke torni de mi kurto viyaje a Londra. I myerkoles empesimos kon la inyeve. Malorozamente esta sivdad topa la bela kon la inyeve. No le yakishea. Mizmo si la Munisipalidad lavora bastante, el rezultado no es muy diferente. Oy diya de vyernes komo las eskolas eran serradas i una grande partida estavan lavorando online de kaza, me fui en poko tyempo al echo. Dizen ke esta inyeve va kontinuar unos kuantos diyas mas.
Es diya de jueves ke me fui a Ulus a los funerales de muestra kerida amiga Lizi Behmuaras. Kreo ke muy pokos miembros del Şalom se topavan en esta seremoniya. I uno deviya azer un diskorso o avlar unos kuantos biervos sovre Lizi. Tuve pena de ver esta situasion. I puediya avlar dospues ke fue enterrada. Ma avia poka djente. Eya era de la Eskola Notre Dame de Sion i era prezidente del Juri ke dava kada anyo un premio de literatura a un livro. Reelmente era una onor para eya. Ma kero achetar ke el Şalom la semana pasada dyo una grande emportansa a Lizi i a su pasado. Munchos eskrivanos eskrivyeron artikolos sovre Lizi. Kale achetar ke no se topava en el Şalom a lo manko los 20 anyos dalkavo.
Es el mizmo diya ke los Militanes del Hamas dyeron los muertos Israelyanos a los Israelyanos. I malorozamente esto fue una trajedia para el mundo sivilizado. I dospues del test de DNA vieron ke la mujer ke fue embiyada no era Shiri Bibas. En primero disheron ke es los del Kroche Kolorado ke trokaron los muertos. Bavajadas. Dospues de unas kuantas oras achetaron sus yerro. I a la media noche embiyaron la muerte Bibas demandando la muerte Palestiniana. Es esta fin de semana ke otros sesh Israelyanos van a ser liberados kontra 600 kondanados Palestinianos. I kon este troko la primera partida se va eskapar. Vamos a ver lo ke va afitar kon la segunda partida.
Kreo ke vos di una data para la Ekspozision de las Ketubas i de las fotografias de las novyas i de los novyos de İzmir ke va topar lugar en la Sinagoga Ets Ahayim. Va ser un grande plazer de realizar esta ekspozision kon los lavoros de Sarit i Selim Bonfil. La avyertura va ser el 25 del mez de Marso i va estar avyerta dos semanas. Espero ke los Izmirlis van a tomar plazer de este evenimyento.
