El 25 del mez de Marso 1911, uvo un grande fuego en una grande fabrika de New York (The Triangle Factory). Las lavorantes de esta fabrika eran Italianas i Judias ke aviyan emigrado kinze anyos antes a los Etados Unidos para topar una vida mijor. Sien i kuarenta i sesh de las kinyentas lavorantes de la fabrika murieron de vista en el fuego. Los patrones uzavan echar kavenado a las puertas de salida afin ke las lavorantes no puedan rovar nada. Por modo de esto, no pudieron avrir las puertas de salida i munchas preferaron echarsen de la ventana abasho, en lugar de kemarsen bivas bivas.
"The Ladies' Garment Workers' Union" (LGWU) ke es un sendikato de lavorantes de produktos de ornamento, organizo un miting kontra las kondisyones perikolozas de lavoro de las mujeres. Investigasyones kontra los patrones kontinuo un sierto tyempo i a la fin las lavorantes pudieron ovligar los patrones a pagar un sierto montante a las famiyas de kada viktima. Este insidento tuvo una influensia sovre la lejislasion de lavoro en Los Estados Unidos. Despues de un kombate largo i difisil, el sendikato (LGWU) reusho a obtener mijor kondisiones para las lavorantes.
Ansi, este grande dezastre fue el empesijo de la organizasyon para estableser un dia para las mujeres en el mundo entero. En los anyos 1960, en el segundo movimiento de mujeres, muevas leyes fueron akseptadas: leyes prohibitando la diskriminasyon i la violensia kontra las mujeres; leyes dando igualas posibilidades de edukasion, de echo, i de konje pagado para las paridas ansi ke diritos por las mujeres kazadas.
Las mujeres judias djugaron un grande rolo en movimientos semejantes. Las aktivistas, las profesionalas, las artistas, las eskrivanas, las intelektuales judias tuvieron una grande kontribusyon en el movimiento de los anyos 1960. Malorozamente las mujeres judias del movimiento enkontraron un otro grande problema: "el antisemitizmo". Ma eyas kontinuaron a lavorar para obtener diferentes derechos i tambien luchar kontra el antisemitizmo para ke el mundo se konsienta de la dezgrasia de este problem.
Las mujeres judias tambien gerreyaron para azer adelantar las kondisiones de las mujeres en las komunidades judias. Rachel Adler es una de eyas. La karga de la mujer judia es mas pezgada de las otras, porke eya es ovligada de gerreyar kon las limitasiones tradisionales del judaizmo. El get es uno de estas limitasiones.
En el livro 'Scapegoat' de Andrea Dworkin, puedesh topar estas linias: 'Las mujeres judias fueron 'scapegoats' (kavras de pekados) en todas las epokas de la istoria. En la Inkizision, las mujeres fueron akuzadas por ser majisianas. En el Olokosto, los nazis atakaron el puerpo de las mujeres sin tener dingun respekto a eyas.
En los anyos 1980, en el treser movimiento de mujeres, eyas penaron para "obtener el dirito de tener reprezentantes en la politika i en el governo", "suprimir las limitasiones en sus karieras" i "ganar el dirito de kurtaj". La judia feminista, Gloria Steimem fue la mas grande protektora de este dirito. Rose Shneiderman, Emma Goldman, Betty Friedar, Hannah Arendt, Gloria Steinem, Rachel Adler, Andrea Dworkin son unas kuantas de estas aktivistas. Oy las mujeres judias son akademisianas, politikas, astronotas i loreatas del premio Nobel.
El lavoro de las mujeres judias en la Diaspora no se eskapo. Sus mas grande gerra es kontra la asimilasion. La mujer judia esta gerreyando para prezervar la identitad judia de sus ijos i de su famiya.
