De munchos anyos atras, la onestedad fue una de las bazas prensipales de una vida kon moral. No tener el ojo en lo del otro es una regla muy emportante para la paz de la persona i de la sosyedad. El dezeyo puede pushar a la persona a kerer lo ke no es suyo. Ma la verdadera felisidad i el repozo es de kontentarmos kon lo ke tenemos i en ganar el pan kon muestra sudor. Mizmo en la Tora tenemos los Diez Komandamientos ke mos ordenan de no tener el ojo en el bien del vizino.
El kontentamiento es una grande kalita ke aze ke la persona se kontente kon lo ke tiene i ke de loores al Dio. La ambisyon traye a la persona amargura. El ke se kontenta kon su ganansya, en lo ke aze kon sus manos, tiene paz en el korason i esta mas kontente de su vida. El kontentamiento es la yave de la felisidad.
Tener ojo en lo ke es del otro no solo danya la konsiensya del ombre, ma tanbien destruye la armoniya de la sosiedad. Ken bushka a ganar sin djustisya, piedre la konfiesya de los otros i puede ser apartado de la komunita. Rovar o tomar lo ke es del otro es konsiderado un grande pekado en la moral i en las relijyones. En munchas kulturas, “komer el derecho del otro” es una ofensa i un pekado muy grande. La verdadera valor esta en lo ke ganamos kon el esfuerso de muestra sudor. Lo ke es ganado kon el kamino onesto traye paz i bendisyon. Lo ke es ganado sin djustisya se piedre siempre a la fin. Ansina tienes una konsiensya repozada. En aleman ay un proverbo muy ermozo ke me plaze muncho. Dize: Ein sanftes Kissen, ist en ruhes Gewissen. Kere dizir ke “El mas blando kavesal, es una konsiensya repozada”.
No tener ojo en lo del otro aze al ombre orozo, felis i en paz. Tener kontentamiento, ganar kon su sudor i respektar los derechos del otro, son las yaves para una vida buena. Nunka devemos olvidarmos ke la verdadera rikeza no esta en las paras, ma en el korason i en la konsensya trankila.
Ma de otra parte vos kero dizir ke, ser siempre kontente de lo ke tienes te empide de avansar. El umano kere bivir en prosperita. Siguro no kon rovar. Kale ke mire kaminos para ganar mas i tener una vida mas agradavle. No se eskapa kon lavorar i komer. Ay tanbien aktividades sosyalas. Lo emportante es konkurensyar en respektando los derechos de otros. Kale azer lo mijor i produsir inovasyones. Si la persona ve una koza mueva en el denfrente, i no perkura a tenerla, es difisil de adelantar. Este dezeo no deve de ser “selo”, ma “inspirasyon”.
