En aserkando de Adar mos akodraremos ke este diya, se komemora los soldados donde ni la tomba ni el lugar no se save, i para ke no se olviden de eyos. Se vijita los simeteyeros, se aze seremoniyas, se melda en las Sinagogas Tefilot, i en los Simeteryos Militaryos se aze un diya spesial para estos desparesidos. La razon de eskojer este diya de 7 Adar es atada a la muerte de Moshe Rabenu, ke los Hahamim dekretaron ansi.
La disparisyon del mas grande de los Profetas, sigun el livro de Devarim en el dalkavo kapitolo. De esta seksyon vemos Moshe Rabenu bendizyendo a todos los Trivyos de Israel de las tierras de Moab. En muestra vizyon, sigun los savyos, akompanyamos Moshe Rabenu suvyendo al Monte Nebo i avlando i bendizyendo todo Trivyo de la manera ke pueden entender. El les avla lo ke va advenir, viendo en el avenir los perikolos ke va traversar Israel. Es aki komo un padre kerido espartyendose de sus ijos, a ken darles konsejos i kondukta de vida, akodrandoles las 5 Leyes de la Tora i el perikolo de espartirse de eyos. El Santo Bendicho le amostra la Tierra ke no va ayegar a ver, las Tierras del Galil i de Hebron... Moshe ve este panorama ancho, i se esparte del puevlo. Un diya despues a su kavesera su muevo gia, Yeshua, a ken Moshe aviya dado la “Shemiha” va ampesar la konkista de la Tierra de leche i de miel prometida por el Dyo piyadozo al puevlo de Israel.
Komo 33 siglos antes, Moshe esta siempre delantre de mozotros amostrando el kamino de la Tora akodrandomos los prinsipios, i las Leyes ke detuvo fasta oy el puevlo de Israel en piez.
Despues de akodrarmos este pasaje de la Tora kaminaremos a delantre en Adar, dizeremos endjuntos (Ke she nihnas Adar marbe Simha). Kuando Adar entra, puja la Alegriya. Purim alegre sin sar sin mal, para dodos i para los reynados.
Mos akodraremos ke Adar es mez de Riyir, i es atado al Trivyo de Naftali, el ke korriya para ayudar i dar mesajes emportantes. Todo se va kontar, todo se va analizar. Vamos avrir la Megila i vamos a kontrar komo anyos antes Ester, Mordehay, el Rey, Aman a rasho, i por entender bueno vamos ampesar al empesijo de la istorya de muevo.
Todo ampesa en el anyo 930 A.J. despues de la muerte del Rey Shlomo Ameleh, kon el manko de union entre Raboam, ijo de Shlomo i el Jeneral Jeroboam.
El paiz se espartyo en doz, el Reynado de Israel i el Reynado de Yehuda kon su Kapitala Yerushalayim. Los Ebreos del reynado de Israel fueron deportados por los Asiryanos i se esparesyeron por entero. El reynado de Yehuda kon su Bet-Amigdash fue destruido i el puevlo fue yevado en Galut en 586 a Babilonya. El Rey de Persya, Cirius aze la konkista de Babel i permete a los Judyos de tornar a sus tierras.
I aya va ampesar la istorya de Purim ke konosemos siempre. Xerxes, nombrado Ahashverosh en la Megila de Ester, ijo de Darius va reynar este imenso imperyo.
Todos estos detalyos mos ayudaran a entender mijor Purim i sus miraklos i alegriyas.
