En muestro payiz en Turkiya, dospues ke pedrimos el Gran Rabino Asseo, el Konsilyo Laik dyo karar de no elijir un Gran Rabino asta su muerte, para toda su vida… I avlando kon el Ministerio del Interior se dyo karar ke kada 7 anyos se van a realizar eleksyones para elijir un Hahambashi. El Hahambashi ke esta en poder, puede ser elijido una segunda, una tresera mizmo una kuatrena vez al posto. I fue este modo.
El gran rabino Haleva fue elijido 3 vezes. Normalmente las eleksyones se devian de realizar en el anyo 2024, ma los dirijentes demandaron la permision del Ministeryo para realizar las eleksyones 6 mezes mas tadre.
I fue este modo. Ma malorozamente en este tyempo el Gran Rabino Haleva mos desho la buena vida. Para preparar los Raves mas mansevos, los tres fueron nominados kon sira komo prokuradores del Gran Rabino. I durante sus mision, egzekutaron una partida de los doveres del Hahambashi. Dospues de la muerte del Hahambashi esta vez se avlo kon el ministeryo i se dyo karar lo ke se va realizar.
Se dyo karar de realizar estas eleksyones en el mez de Septembre. I asta esta data, la Komunidad teniya de menester de un Hahambashi por prokurasion.
Entre los kuatro kandidados de Hahambashi, el Rav Sevi deklaro ke no kere ser Hahambashi. I le demandaron de ser Hahambashi asta las eleksyones. I acheto. Esto muy kontente de ver un ombre de ley tan korekto para este posto, mizmo ke su mision va turar sesh mezes.
El Rav Sevi, en mizmo tyempo el Hazan aRashi de muestra Komunidad, es respektado por los Hahames importantes de Israel.
Kuando era prezidente de la Komunidad, tuvimos syertos problemes kon los Hahames de Israel. I el Rav Sevi era el ke dava konfiensa a estos Hahames.
En estas eleksyones, el rav Nafi Haleva, el rav İzak Alaluf i el rav İzak Peres van a ser los tres kandidatos. Va ser una perioda rigoroza. Les auguro reushita.
