Lo ke Israel agora esta sufriendo es parte de un muncho mas grande plano ke lo akompanyo desde su nasimiento.
Durante setenta i siete anyos, el puevlo de Israel estuvo ovligado de bivir kon la gerra o la amenaza de la gerra, el terorizmo o la amenaza del terorizmo. Dinguna nasion en el mundo no fue ovligado de bivir lo ke Israel bivyo kon un grande koraje. Lo ke Israel sufrio i esta sufriendo es parte de un plano mas grande ke viene desde Purim i del livro de Ester, el malo dezeo de matar, destruir i eksterminar kada judio, la primera garantia para el jenosidio, el intento de inyegar el derecho de egzistir al puevlo judío.
Deke, en un mundo ande ay 82 nasiones kristianas i 56 muzulmanas, es tan difísil para la djente de akseptar el derecho del puevlo judio de tener sola una nasion? La koneksion entre los judios i la tierra de Israel remonta a mas de 3.000 anyos. En el Oksidente, no ay otra nasion tan vieja, malgrado esto, los judios estan ovligados a gerreyar por el derecho de egzistir. Solo el Dio lo save. El sufrimiento de Israel es muestra dolor. Su koraje mos da orgolio. La primera leson de Purim es “Mordehai no abokava kavesa. El puevlo judio no aboka kavesa delantre dinguna presion. Espesialmente el puevlo judio en Israel’’. "El" mos va giar a muestra tierra.
Grasias a Israel, grasias a vuestra fuersa, grasias ke refuzash de espantarvos, kada judio kamina oy kon la kavesa ariva. El destino de Haman es el destino de las nasiones ke tuvieron la intision de destruir al puevlo judio. Todos se destruyeron a si mizmo. Grandes imperios kijieron danyar el puevlo judio: desde Ejipto, Babilonia, Gresia i Roma en la antikuedad, asta el Treser Reich i la Union Sovietika en el venten siglo. Paresian indestruktivles. Todos desaparesieron, mientres ke muestro chiko puevlo puede dizir “Biva el Puevlo de Israel”.
