Kaji 15 anyos antes mos fuimos a Salonika. Kedimos muy kontentes de konoser esta sivdad. Mos namorimos de la muzika, los bayles, las komidas i la mar de Egeo. Por esto despues de akel anyo kuando mos fuimos a Salonika izimos kada anyo el program de enverano para irmos a una izla de Gresia. Empesimos de Thassos, despues Chios, Lesvos, Samos, Santorini, Mykonos, Crete. Mas de las izlas mos fuimos a Athenas i Alexandropoli. Kada vez ke mos vamos a las izlas o a Gresya tornamos muy kontentes. Del servisio, de los presyos, de la mar ke parese vidro. Ay izlas ande puedesh irvos kon vuestro otomobil o puedesh alkilar un oto del lugar ande vos fuitesh. Los oteles no son muy karos. Para kada aldikera se puede topar oteles.
Los izlas son grupos i grupos. Se konosen 12 izlas, Khihlates, Izlas del Norte Egeo i las izlas de la mar de Iyon. Fin agora si no vos fuitesh a la Gresya o a las izlas, absolutamente vos konsejo de vijitar. La djente son muy sempatikos i eglendjeli. Toman muncho keyf de komer i bever i baylar. Las kantikas Gregas el Rebetiko, el Kasapiko, el Sirtaki son muy ermozas. Kuando oyen estas kantikas, si bevyeron una kupika de Uzo ke es el raki de los Gregos, pishin se alevantan a baylar.
La kultura Gastronomika parese muncho a la muestra. Por egzempiyo, el Tzaziki es komo el djadjik muestro. El Musakka, Dolmades ke es el yaprak sarma. La tarama lo azen komo mozotros. El kalamari, el oktopus, el karides dizen ke es muy savrozo. En vezes lo friyen o en vezes lo asan. Los Pishkados son komo topamos en los balukchis de Estanbol. Chipura, Levrek, Barbun, Somon i Sardina. A mi me plaze kuando me vo si es el tiempo de Sardinas komer asado. Es la savor de komer los dedos.
Si vinimos a las salatas, en el mundo entero se save kon el nombre Salata Grega. En Grego lo yaman Horiatiki. Horiatiki kijo dizir salata de kazal. Es komo la salata muestra ke se yama Choban salatası. La diferensiya solo es el kezo blanko, Feta ke meten ensima. Agora vos kontare komo azer la Salata Grega.
Materyales:
3 Tomat kortadas grandes pedasos
2 Pipinos
1 Pimyenton Charleston
1 Sevoya kolarada chika kortada komo piyaz
4-5 Azitunas Kalamata
1 Revanada de kezo blanko, Feta
1 Piska de Oregano
Para la sos:
2 Kucharas de supa de azete de oliva
1 Kuchara de supa de vinagre
1 Kuchara de supa de Limon
Sal
Para aparejar:
Las zarzavates ke esta eskrivyendo ariva se kortan grandes i se meten aryento de un chini de salata. Las azetunas i el kezo se mete en medyo de la salata. Ensima se mete la sos ke se karishtireyo i se mete ensima el oregano.
De la savor de tomat es o sino de la azete es, no se ma esta salata es una lokura. Se puede komer kon una revanada de pan solo. O si no al lado de las komidas i si keresh al lado de los mezelikes. No vos olvidesh de bever un vaziko de Uzo Barbayani.
