La perasha de Shekalim se melda antes de Purim. En la seksion de Melahim. Topamos este pasaje de la Tora, ke mos konta komo, el Rey Yoas manda a yamar el Kohen aGadol para ke ordone a enderechar el Templo i sus roturas.
El Rey Yoas aviya suvido al Trono despues de evenimyentos trajikos, la Reyna antes de el, Atalia era una Reyna kruela. A la muerte de su ijo Ahazia, se metyo a eliminar todos los miembros de la rasa real, orozamente ke Yoas, ke era una kreatura fue guadrado, i salvado por un paryente durante 6 anyos, i suvyo al Trono dainda kreatura i resivyo la Korona real. Atalia fue egzekutada, i Yoas reyno serka 40 anyos en el Trono de Yerushalayim, kon derechedad i santedad.
La Aftara ke akompanya la perasha de Shekalim, los Sikles se melda antes de Purim i el anyo de Shekalim ampesa en Nisan i por esto se ampesava arekojer estos Shekalim en el mez de Adar. Este dasyo era para enderechar el Templo i toda la populasion deviya de pagar sin dinguna diferensya. El Templo era el sentro spiritual de kada uno, riko i prove deviya partisipar a este dasyo ke era de medyo shekel para todos. Sigun el livro de Zohar, kada persona es echa de dos partidas spiritualas, la una toma la erensya de sus paryentes i de la sosyedad, i la otra de sus esforsos. Devemos pagar a la sosyedad lo ke arisivimos de eya, pagar este dasyo de medyo shekel, se puede tanbien azer donos, ke se espartiya entre todos para ke el Templo seya ordonado. Oy no puedemos entender egzaktamente la santedad de este lugar el mas Santo. Repetaremos dunke, ke kuando el ombre entrava al Templo despues de purifikarse, sintiya ke se esta aserkando de la santedad del Rey del mundo, komo una kreatura serkano de su madre. El Templo era para todos uno.
Komo disho el Rey David, "Sinyor del mundo mi korason no esta yeno de orgolyo, mis ojos no bushkan lo ke es mas alto para mi… Ke Israel meta su aspero de agora fasta la Eternitad. Amen" (Tehilim 131) Esta seksyon se melda antes, serka de Adar. Los Shekalim siendo una perasha ke mos akodra una oja de la istorya de Israel.
