Es diya de alhad kon mi mujer i unos kuantos amigos mos fuimos a la Büyükada para partisipar al “Mimofest” i al torno ke realizo el Muzeo de las Islas para ke la djente pueden ver las mimosas en las izlas. Es kuatro o sinko anyos antes ke el Muzeo de las Izlas organizo el “Mimofest” . La flor Mimoza da flores solo dos mezes al anyo. Empesa a dar en el mez de febrero, i eskapa a la fin del mez de marso. Este anyo antes de estos tornos, se espantaron porke la inyeve vino dospues ke los arvoles empesaron a dar flores. Ma no fue komo se espantaron. Komo esta flor ama la agua, la inyeve fue una okazion para estos arvoles. I dyeron mas munchas flores. Es por la primera vez ke vide la vaye de las mimozas serka de Yörükali (Yorgouli). Mozotros vijitimos una guerta partikular kon un alay de arvoles de mimozas. Es una flor muy presyoza. Mos ambezimos ke la mimoza vino de la Australia en la primera meatad del siglo 19, kon todos los payizes evropeos. En syertas sivdades o kazales Evropeos organizan festivales. Ma en estas sivdades, la sivdad i los sivdadinos ganan paras de esta flor. Se aze kolonyas, parfumes, biskochos i likores de estas flores. Los ke realizan syertos objektos de arte kon estas flores toman lugar en los standes ke se topan en el muzeo de las izlas.
Empesando del diya de martes (4 Marso) asta el diya de alhad (9 marso) kada diya un alay de aktividades toparon lugar en el muzeo de las Islas. Es diya de vyernes ke organizaron un kortej i dos konsertos ande los tanyedores de las kayes de la Munisipalidad i los tanyaderos de las kayes del Muzeo de las Islas tanyeron en el sentro de la Büyükada. Se organizo ekspozisiones de tablos de arte en el Klub Anadolu i en el Muzeo de las Izlas. En el muzeo, el pintor Yavuz Saraçoğlu organizo una ekspozision kompozado de tablos de mimozas.
En todas las islas fueron organizados diferentes konsyertos. Espero ke kada anyo este modo de aktividades van a ser realizadas.
