Alp Etensel
Una eskola fue kostruida en el anyo 1454. Se yama Megali tou Genous Skoli. Agora la konosemos kon el nombre, “Fener Rum Erkek Lisesi.”
La fondasyon de la eskola se remonta a despues de la konkista de Estambol. Fue establesida por los gregos ke tornaron a Fener, grasyas al dekreto (ferman) de Mehmed II ke dyo permision a los ortodoksos de resivir edukasyon en sus propya lingua.
El edifisyo aktuel de la eskola fue dizenyado i konstruido en 1881, por el arkitekto Konstantinos Dimadis, ke era un diplomado de la institusyon. Las tuvlas koloradas utilizadas en su konstruksyon fueron traidos de Marsilya, Fransya, i es por esto ke se konose popularmente komo la eskola kolorada. La arkitektura del edifisyo i su domo ainda yaman muncha atensyon.
La lingua de ensenyanza en la eskola es el turko i el grego, i se aplika un program edukativo de 4+1 anyos. Aktuelmente esta eskola esta aziendo todo lo posible para evitar su serradura. Tiene 33 estudyantes. Alora, porke ay solo 33 estudyantes en este edifisio tan gloriozo i antiguo?
Despues del Tratado de Lausanne, las eskolas minoritarias kedaron protejidas, ama sujetas a un plan de estudios uniko i a kondisyones determinados. Este plan se konkreto kon la ley “Tevhid-i Tedrisat”. Este ley permetia ke solo las personas de orijin minoritaryo se matrikularan en las eskolas de minoritas.
Por esto los estudyantes turkos no pueden matrikularsen en estas eskolas.
Yo vide un roportaj kon el direktor de esta eskola, Dimitris Zotos. La reportera Kornilia Bayvertyan demando: Aksepterias estudyantes de diferentes minoritas o estudyantes turkos en vuestra eskuela? El respondo: Esta es una situasyon internasyonal ke depende de las negosyasyones entre Turkia i Gresia. Porke no? Somos estudyantes. Por esto, seria bueno para mozotros traer mas estudyantes. Podesh ver el resto de la entrevista: https://9koy.org/author/korhan/ozel-fener-rum-lisesi-kapanmamak-icin-direniyor#
Yo tambien ize un roportaj kon sinyor Dimitris Zotos i le demandi 3 demandas.
-Agora tenesh pokos estudyantes en vuestras eskolas. Vash a reunir las eskolas?
-Se parese lojiko de reunir las 3 eskolas, Zografyon, Fener Rum i Zapyon. Ama ainda no dimos un karar, puede ser un dia se van a reunir.
-Yo repeti la demanda de sinyora Kornilia.
Keriash ke uvyera estudyantes turkos en vuestras eskolas?
⁃ Si, naturalmente. Somos edukatores, seria muy feliz.
⁃ Ke pasara kon vuestra eskola si el numero de estudyantes diminuye i renkontra el riziko de ser serrada?
⁃ Ya avimos afrontado el riziko de ser serrada. Esta eskola tambien avia vido tyempos kon 3 estudyantes. Estamos aziendo todo lo posible para evitar ke se serre.
Termino mi artikulo rengrasyando al sinyor Dimitris Zotos i esperando el bienestar i la kontinuidad de estas eskolas. Al vermos
