Una tadre en el enverano de 2015, David Birnbaum estava entrando a su kaza en Muncie, New York. Una ijika de siete anyos ke biviya al lado de su kaza, estava asentada en el trotuar al lado de la entrada. David no la vido. Su oto de dos tonas la chapteo. David oyo sus gritos, salto de su oto i yamo la Hatsallah, ke es el servisio mediko volontario judio de emerjensia. En dos minutos, Judah Hoffman estava aya kon su ambulansia.
Judah presto la metio a Sari en una sedya, la suvyo a la ambulansia, i koryo al ospital. Arivo al ospital en diisyete minutos. Le izieron a Sari unos kuantos prosesos medikos. La ijika teniya las pachas rotas, ma grasias al Dio se iva azer buena.
Akeya noche, Judah no pudo durmir. Estuvo pensando komo alkanso al ospital en unos kuantos minutos. Se akodro komo se aviya echo un miembro de la Hatsallah. El tambien, aviya pasado un terible aksidente kuando teniya onze anyos. Judah estava tornando de la eskola kuando una kamyoneta torno la punta de la kaleja i lo chapteo.
Una mujer ke se yamava Miriam Brick vido el aksidente i koryo al buro de Dr. Marvin Bess, un pediatro muy konosido en akeya rejyon. Le rogo ke venga imediatamente. Entremientes otros lo yamaron al padre de Judah. El doktor lo akompanyo al ospital Bethel, ande le salvaron la vida. Agora, 34 anyos duspues, un pensamiento le vino al tino de Judah. La mujer ke koryo a bushkar el doktor para salvarlo se yamava Miriam Brick. La alkunya de la ijika tambien era Brick. Es posivle ke tengan una relasion?
Al diya, Judah izo unos kuantos telefones i deskuvriyo la koensidensia. La ijika ke Judah ayudo a salvar era la inyeta de la mujer ke aviya ayudado a salvarlo trenta i kuatro anyos antes.
La palavra ebrea ke se uza en la Tora, ke mos ambeza a dar o ayudar a los otros, es la palavra Natanu. Natanu es un palindromo. Se melda de la mizma manera delantre i atras. La Tora mos ambeza ke kada vez ke una persona da a un otro, seyga su tiempo, su atansion, su estimo, su ayuda finansera, esta aksion va retornar a si. Dar es sikliko, a la fin te retorna a ti. Judah no saviya ke aviya pagado atras una aksion noble. Salvo a la inyeta de la mujer ke lo aviya salvado anyos antes.
Bushkaremos oportunidades para ayudar a los otros, a los ke tienen menester de muestra ayuda. Ke muestro akto de buendad trayga salud i bendision al mundo.
