Aviya de ser, en un payiz muy leshos, un rey muy riko kon sus kuatro mujeres.
El rey amava su kuatrena mujer mas ke todas. Siempre la prezentava a los miembros del palasyo i se alavava kon eya. Estava muy kontente de eya porke amostrava su grandeza.
El rey amava tambien su tresera mujer i era muy orgolyozo de eya. Le merkava los mijores vistidos, le trayiya las mijores komidas i la regalava muncho. Le aziya todos sus dezeos.
La sigunda mujer era su favorita tanbien. Era su konfiensa. Le kontava todos sus sekretos i la konsultava en los problemes los mas difisiles. Era savia i pasyente. Le dava konsejos entelijentes i le ayudava en tiempos de kriza.
Ma el rey no amava a su primera mujer. Malgrado ke era muy fidel i aziya munchas kozas para su bien sin ke el se apersiva, no se okupava nunka de eya i nunka le dava grasias.
Munchos anyos despues el rey se izo viejo i hazino i sintio ke su fin se esta aserkando. Se akodro de todo lo bueno ke aviya tenido en su vida i se komparo kon su estado de agora. Penso: “Yo tengo kuatro mujeres, kuando mis diyas se eskaparan, una de eyas por siguro me akompanyara.
Yamo a su kuatrena mujer i le disho: “Agora ke esto aserkandome de la muerte, me akompanyas?”.
“Es emposivle, ya tengo todo lo ke nesesito, por esto no va kedar kon ti, emposivle”.
El korason del rey se rompyo: “Vo yamar a mi tresera mujer, ke era mi orgolyo.
La yamo i le disho: “Tu eras la kara de mi reynado, agora ke son mis oras dalkavo vienes kon mi?”.
“Kuando eras mansevo estava kontente de estar a tu lado. Agora ke te izites viejo ke te va azer? Despues de ti me va kazar kon otro”.
Una tristeza grande tomo al rey, yamo a su sigunda mujer. Le demando la mizma demanda. “Ekskuzame, ma otros tienen de menester de mi agora. Lo ke puedo azer es azer una ermoza seremoniya detras de ti”.
El rey se sintio dezesperado de dolor i deziluzyon. En supito oyo una boz kalma ke le disho: “Yo ya vengo kon ti mi rey”. El rey miro i vido su primera mujer, una mujer vistida en manera modesta.
Agora vineremos a la ke mos konto esta konseja.
Todos tenemos 4 espozos en la vida. El kuatren es muestro puerpo. El karar ke lo miramos i mos esforsamos a ermozeyarlo, a la fin mos va deshar.
El treser es muestra rikeza i muestro estado. Kuando mos vamos a ir, todo lo vamos a deshar i va kedar a otros.
El sigundo es muestros keridos i muestra famiya. Todas las personas kon ken partajimos los sekretos i la vida, lo ke pueden azer es dizirmos adio kon ojos yenos de lagrimas.
Ma el primer es muestra alma. Viene kon mozotros.
No mos olvidaremos!
No es lo ke komemos, ma lo ke dijeramos es ke mos aze fuertes.
No es las paras ke ganamos, ma el amor i la amistad ke akumulamos ke mos aze rikos.
No es lo ke meldamos, ma lo ke mos akodramos ke mos aze savidos.
No es los konsejos ke damos a los otros, ma lo ke aplikamos en muestra vida ke mos aze verdadmente umanos.
