Dospues de muncho tyempo, loores al Dyo ya ayegimos a fyestar un Purim en la eskola djudiya. Ke desho la korona, ke tomo el rash de Hatay, dospues la gerra ke no mos desho gana de nada, atorgare ke ya mos vino kon muncho plazer.
Este anyo fue el 20en anyo de la kreasyon del koro “NES” i mezmo tyempo del koro de kriaturas “ESTREYIKAS d’ESTAMBOL”.
De sorte ke el kreador de estos dos koros “İZZET BANA”, arekojyo kaji 30 kreyaturas de 7 a 10 anyos i empeso a ensenyar su lavoro sakro, ke es ambezar kantikas en ladino. Dospues dyo anunsyo al koro NES ke ya estavamos asperando a ojos a ojos, kijo aunarmos i fyestar este aniversaryo todos endjuntos. Ma teniyamos poko tyempo. Si solamente teniyamos un poko mas de tyempo no tendriyamos este karar de ansyedad i stres.
El 13 marso djueves, dospues de midi, ken en taanit, ken desho el echo, mos topimos en la eskola para azer prova. Ya vos imajinash tanta kreatura, i tantas mujeres, el balagan.
İzzet Bana, kale agradeser por su pasensya, por su enerjiya i por su resolusyon. El organizo unas kuantas ayudantes. Una de eyas era LİNET ESTİROTİ i otra ORA GÜRKAN veramente meresen munchas grasyas porke penaron sin kedar.
En fin la prova eskapo, se korto taanit, no aviya muncho tyempo de pedrer, todos mos vistimos los kostumes de Purim, las luzes se amataron, la muzika empeso, es la ora la mas emosyonante.
El program empeso kon los kantes de las kreaturas i kon la pyesa de Purim. Era de verlos kon los kostumes, de Ahashverosh, de Ester, de Vashti, de djariyes i de guardyas todos degizados, estavan andjelos para bolar. Dospues de la pyesa de Purim, suvyo a la shena el koro NES i kantaron todos endjuntos las kantikas ke aparejaron para este diya. Entervalo un ermozo ijiko de 10 u 11 anyos nombrado NOAH YOHAY, kanto una kantika en espanyol ke kedimos atusyazmados mozos i el salon entero. Una boz dono del Dyo. Le oguro a sus paryentes mazalozo ke seya i syempre ke vaya adelantre.
Entre las kantikas sefaradis, SEMİ GRANTİ, kanto una kantika en fransez muy sentimental “LE 7 OCTOBRE” kon un aksento maraviyozo ke mos izo a todos yorar.
Dospues a SEMİ GRANTİ lo akompanyo una ermoza jovena nombrada SİDEL MİZRAHİ, kantaron endjuntos la kantika del muzikal Anatevka “Sunrise Sunset”; estavan una maraviya.
El program eskapo kon kantikas alegres a las kualas partisiparon el salon entero.
Dezeo estos i munchos Purimes alegres kon pas i amor, espero ke kontinuen las ESTREYIKAS d’ESTAMBOL i EL KORO NES ke es el solo koro sefaradi en Turkiya.
