La selebrasyon de Balat Ahrida Purim, ke estava suspendida por serka 4 anyos desde el Purim de 2020, de la pandemiya i las trajedias del 7 Oktobre kontinuo de ande se kedo kon una manyifika fiyesta el 16 Marso 2025. Purim es en realidad una liberasyon no del esklavaje, si no de la kalomnia, la konspirasyon, de las mentiras, i del dezastre. Es por esto ke Balat Purim es muy importante porke en la festividad de Purim de 1893 despues de ke la komunidad termino la orasyon de la tadre i abandono la sinagoga Selaniko, dospues de 5 puntos se destruyeron las paredes de la sinagoga, ma la shans ke no aviya dingunos, por esto kada anyo se selebra Purim kon entuzyazmo en Balat. Este anyo uvo muncho entereso, porke 4 anyos no se izo la fyesta, la performans de Hayim Behmoaras, kon İzzet Bana i Estreyikas d'Estanbol fue manyifiko. Kon las kantikas de Estreyikas, Hayim Behmoaras tambyen plazyo a todos, kon las estoryas, i kon vyejas memoryas, i el papel de meddah. Los deskorsos del prezidente de la Komunidad de Balat, Moris Levi i de Rav İzak Perez avlaron sovre la importansya del diya ke fue un entuzyasmo espesyal ver a todos partisipar kon felisidad, i alegria kon kantikas i mizmo bayles. Esta seremoniya se eskapo kon un maraviyozo dezayuno.
Ke kada anyo seya bendicho.
