De vez en kuando resivimis SMS en el telefon o vemos en la televizyon avizos dizyendo “se bushka sangre A Rh+ (o otro grupo!), los ke pueden dar sangre deven telefonar al numeo xxxxx”.
Es de saver ke en este sujeto ay nombres Djudios famozos. Vos va eskrivir sovre 3 de estos nombres.
En 1901, Karl Landsteiner (14 de Junyo de 1868 - 26 de Junyo de 1943) deskuvryo ke las personas tyenen diferentes tipos de sangre i en 1909 pudo empesar a etiketar los diferentes tipos de sangre. Nasido en Viena, Landsteiner meldo en la Universidad de Viena, ande, despues de syertos anyos de investigasyones en diferentes eskolas, se izo uno de los profesores. En 1919, Landsteiner se mudo a La Haye, ande fue rekrutado en 1922 por el Instituto Rockefeller de Investigasyones Medikales de New York. Landsteiner resivyo el Premio Nobel de Fizyolojiya i Medisina por su lavoro sovre los tipos de sangre en 1930 i partisipo en importantes investigasyones en imunolojiya, patolojiya i hematolojiya. Durante su lavoro en el Instituto Rockefeller, kolaboro kon otros dos konosidos investigadores hematolojikos djudios, Alexander Wiener i Philip Levine.
Alexander Solomon Wiener (16 de Marso de 1907 – 6 de Noviembre de 1976), ke bivyo toda su vida en New York, era ijo de imigrantes djudios Rusos. A los 15 anyos resivyo una burs para la Universidad de Cornell. Posteriormente, en meldando en Long Island College of Medicine, Wiener empeso a realizar investigasyones sovre grupos de sangre en el ospital djudio de Brooklyn, djuntos kon Landsteiner. En lavorando para topar syertos endikatores en las sangres, deskuvriyeron el factor Rh+/-. Yamaron a este faktor de sangre Rh al onor de las maymunas rhesus ke empleyaron komo sujetos de prova. Fue Wiener en kargo de topar los problemes ke los faktores Rh inkompativles de ser la kavza de syertos problemes en las transfuzyones de sangre: La sangre Rh+ administrada a un hazino Rh- provokava la kreasyon de antikores danjorozos.
Un punto interesante: devido a ke sus investigasyones sirvyeron al desvelopamyento de la sensya de forensika i la identifikasyon kriminal, Wiener fue nombrado myembro onorario de la Asosiyasyon de Eskrivanos de Misterio de los Estados Unidos.
Philip Levine (10 de Agosto de 1900 – 18 de Oktubre de 1987) vino a New York de Kletsk, Rusia, kuando teniya 8 anyos. Meldo en el City College i en la Universidad de Cornell; despues de sus estudios lavoro komo asistente de Landsteiner. Entre 1932 i 1935, Levine dirijo un ekipo de investigasyon en la Universidad de Wisconsin en Madison, ma torno a este para tomar un posto en Newark Beth Israel. Bazandose en los rezultados de la investigasyon sovre Rh+/, Levine provo korektamente la ipotez de ke esto era la razon de la enfermidad hemolitika de los muevos nasidos. Djunto kon Wiener, Levine kreo una prosedura de transfuzyon ke salvo las vidas de un numero inombravle de bebes.
