La semana vinidera, vamos a fyestar “PURIM” en todas las keilas, las organizasyones djudiyas kon grande entuzyasmo, i las kriyaturas kon grande egzaltasyon.
En la istorya de Purim; “AMAN” es la persona negra i maldicha ke supo travar la atansyon del imperador Ahasverosh, ensima de los djudyos, para eliminarlos del mundo.
El vizir Aman, era una persona muy negra i le plaziya vazyar sangre. Kuando empeso a enteresarse en los djudyos, se apersivyo ke eyos kreen al Dyo Poderozo, una fuersa ke no se ve, i eyos tyenen unas tradisyones diferentes de todos. Son reushidos en todos los espasyos, i rikos. Estas todas partikolaridades de los djudyos no le plazyo a Aman, i se desido de despareserlos del mundo.
El buto suyo era de menospresyar al djudyo, para ke la fuersa ekonomika de el pase, al rey.
Antes siglos del evenemento de Purim; si miramos a la Espanya, i aki vemos la mizma koza, komo ke los djudyos son viktimas del mizmo komporto de punto de vista konfiensa.
Akel tyempo en la Espanya, aviya una perioda de los katolikos muy ferventes.
Ma el djudyo era diferente. El era muy fuerte, de punto de vista de kultura i sosyal. No aviya asimilasyon del todo. Ma malorozamente, el destino del djudyo era el mizmo. Los aviyan ovligados a trokar sus relijyones, i a los ke no akseptaron los kemaron. Esto sureyo un siglo, i kuando no salyeron abash, en 1492, los egzilaron.
En 1930 en la Almanya, se enkontraron kon el mizmo evenemento.
En la istorya, en Misrayim; el djudyo no rezistyo, i a la fin lo izyeron lavorar komo esklavo. En “Shushan” yene no rezistyo, grasyas a la reyna Ester; ke era aliada de los djudyos, se salvaron de murirsen.
En la Espanya de muevo no rezistyeron, i unos kuantos trokaron sus relijyones. I a la fin en la Almanya; malgrado Hitler, no se imajinaron de lo ke puede afitar, i munchos se muryeron en el Olokosto.
La “Megila Ester” mos ambeza ke las difikultades de la vida ke enkontramos, son un egzamen para ayegar, para arivar a lo mas mijor, ke los detenimyentos son okazyones para desveloparmos.
I esto todo vyene de la mano del Dyo ke no vemos, i ke mos gia el destino.
Las Mitsvas de Purim ampesan kon Taanit Ester, ke se aze el 13 del mez de Adar. Es el rekuerdo de la data, ke Aman aviya desidado de eliminar a todos los djudyos.
“Keriyat Megila”, es la mitsva ke todos kale ke melden en el dia de Purim: la “Megila Ester”.
Seuda de Purim:
El miraklo de Purim se realizo, entre las envitasyones i pransos. Por esta kavza Purim es una fyesta kuando todos deven de dar una seuda.
“Mishloah Manot”. Todos, en dia de Purim kale ke agan regalo dos komidas kayentes i bevyenda, a lo manko a una persona.
“Matanot Laevyonim”:
Komo Mishloah Manot, i esta mitsva kale ke se aga en dia de Purim. Distribuir moneda a los menesterozos, a lo manko a dos personas en este dia mirakulozo. Azer orozos a los menesterozos sin averguensarlos.
La konkluzyon es ke kale kreer en los miraklos.
Kuando kreemos a muestra fuersa i a lo ke puedemos azer, kuando tenemos konfiensa a mozotros mizmo, i kuando mos konosemos, muestra vida se inche de los miraklos.
Si la persona kere veramente de aryento del korason una koza; si tyene una konfiensa grande en esto; estamos vyendo ke esto, se esta realizando.
Kale ser pozitivos, todo mos toka en primero a mozotros, i mos enfluensa en bueno u en malo.
Pardonar al den frente, es akseptar las personas asegun son. Deshar lo pasado, es avrir lugar en muestra vida, a la kerensya i a los miraklos.
“La vida es un miraklo, ma los miraklos son los ke estan guadrados aryento de muestros korasones”.
