Aryento de las sivdades, para viyajar me plaze mas muncho New York. Puedesh topar djente del mundo entero; de Evropa, de Asia, de Afrika i de Sud Amerika. Todos los grupos tienen maalles ande biven endjuntos. Ay China Town, Little Italy, i los djudyos mas muncho biven en Brooklyn. Aki di ke parese ke es Yerushalayim. N.Y. tiene 5 distritos: Manhattan, Brooklyn, Queens, Bronx, i Staten Island. Se puede dizir ke el korason de la sivdad es Manhattan. Los edifisyos komo Empire State, Crysler, Flatiron, ets, kon eskrivir no se eskapa. Aryento de estas fraguas se topa la guerta ke se yama Central Park. Es una guerta muy grande ande aryento imajinavos ke se kamina kon talika. Los muzeos son maraviyozos. Los teatros ande se puede ver muzikales son en Broadway. Kada kaye es komo un bulvar. Ancha i larga. La kaye 5th Avenue es konosida en el mundo entero; las botikas son todas markas konosidas. En N.Y. se topa munchas Sianagogas. Ortodoks, Konservatif i Reformistos. A kada una me fui para ver; todas estavan una mas ermoza de la otra. Vos puedo dizir ke se topa restoranes kasher mas muncho de Israel. Botikas de Falafel de marka Israelyana, botikas de Fast Food de sandvich i Burger Kasher. Kaji kada diya empeso al tur o a kaminar de Time Square. Me plaze tomar un Bagel de Somon füme kon un kafe allado i asentarme en Time Square i en komyendo ver a la djente ke se esta indo al echo. En dizyendo echo, el korason del mundo de la Borsa i de la ekonomiya esta en Wall Street. El sembol de N.Y es la Estatua Liberty. Si keresh vijitar este lugar kale ir a Brooklyn. I kon barka puedesh pasar a esta izla ande se topa la estatua. Komo biven aki muncha djente de diferentes kulturas, puedesh topar kada modo de komidas.
Komo kada vez, vineremos al sujeto del artikolo. Las Salatas ke komi en el mundo. Un diya mos fuimos a un Restorante Kasher i le dishe al garson ke me trayga un Steak asado. Adelantre me trusho salatas diferentes kon los chinis chikos. La meza se izo komo guerta. Aryento de las salatas aviya una deya diferente ke no aviya komido antes. El garson me disho ke es el spesyal de N.Y. ke se yama Salad Waldorf. Porke me plazyo muncho, voz dare la resefta. Puede ser lo azesh i vozotros.
Materyales:
1 Apyo rayado
1 Mansana kortada delgada delgada komo papel
1 Kupa de chay de muez kortada kon los dedos
1 Mango de apyo kortado fino
½ Buketo de Prishil kortado fino
1 Kuchara de supa de uva seka
½ Limon
2 Kucharas de supa de Mayonez
Aparejar
Los materyales ke estan eskrito ariva se meten aryento de un chini ondo; ensima se vazya el limon i la mayonez i se karishtereya endjuntos. Por adornar se mete unas kuantas muezes enteras ensima de la salata. Despues de komer, vos konsejo ke vos vayash a la patiseria bien konosida, a Serendepity o a Max Brener. Las dulsuryas ke vash a topar aya vos van a enkantar.
