Vos puedia ogurar la fiesta de Purim la semana pasada, ma fue kismet para esta semana. Noche de djueves teniyamos de azer dos kozas. En primero ir a la sinagoga para meldar la Megila Ester. Kero kontar la istoria ke se realizo en Shushan anyos antes. El rey del Imperio Pers, Ahashverosh dospues ke desho su mujer; en el imperio bushkaron una mueva reyna. I el rey eskojo la sovrina de Mordehay: Ester. Mordehay no era amado de la parte de Aman, el vizir del saray. La razon era porke Mordehay no se abokava delantre de Aman. El solo se abokava delantre del Dyo de los Djudios. Todos ya savesh la istoria, ma İzzet Bana kon las kreaturas i las dammas del koro Nes kreo kon uno o dos ombres ke transferaron, estavan en la shena del auditorium de muestra eskola en primero para kontarmos la istoria ke es eskrita en la Megila. El salon estava kompletamente yeno. I si no me yerro, repetaron este teatro muzikal diya de alhad en la Sinagoga de Ahrida en Balat. Ya savesh ke kada anyo la Komunidad Djudia de Estanbol fiesta el Purim en Balat, i en la Sinagoga de Ahrida. Este anyo malorozamente komo estava en la Büyükada no me fui a Balat. En primero devo de felisitar a İzzet Bana. Es bastante mansevo i tyene una grande enerjia para perkurar kon trenta kreaturas. Es kapache de empesar kada dos, tres o kuatro anyos de muevo. Porke las kreaturas no se estan kedando en el mizmo boy. Kada dos o tres anyos se estan engrandesyendo. I İzzet empesa de muevo. Este anyo es el venten anyo de las Estreyikas d’Estanbol i del Koro Nes. Kero felisitar a todos ke tomaron parte en este teatro muzikal. Ya konosemos a munchos miembros del Koro Nes. Reelmente estas dammas toman un grande plazer kantando en este grupo. En este teatro muzikal aviya tres mansevos i una kriatura ke vos devo de kontar. La kreatura se yamava Noah Yohay, tyene dyes anyos i tyene una boz maraviyoza. Esta en la eskola Ulus i se esta indo al konservatuar. I su madre, Riket Yohay mos kanto una kansion en ebreo. I disheron ke el ke tomo la boz de su madre.
Un mansevo ke se yama Semih Granti, ke era anyos antes miembro del grupo de las Estreyikas d’Estanbol kon una manseva, Sidel Mizrahi mos kantaron unas kuantas kantikas en ingles i Semih mos kanto dos kantikas en fransez. No se si konose estas linguas. Dospues me ambezi ke Semih estudio en una eskola franseza… Ma estuve muy kontente de oyir estos mansevos. Reelmente muestra komunidad kon su potansiel es muy rika. Mizmo si kada diya tenemos mas mankas personas, semos kapaches de krear muevos mansevas/vos ke van a tener una grande reputasion.
İzzet felisitasiones.
