Ay una dicha ke dizimos en Turko, “Mart kapıdan baktırır, kazma kürek yaktırır”. En vezes el klima se kayenta antes del tiempo, los arvoles avren sus flores, ma vyene Marso, empesa inyeve. Esta dicha se traduse a Ladino i dizimos “Marso aze mirar por la puerta i kema lo ke ay en kaza para kayentar afilu la kavakadura i la paleta”. En estos tiempos mos viene bueno estar en un salon de filmos. I tambien si ay un filmo kon famozos artistos i un sujeto bueno.
Renkontri al filmo de Kate Winslate. Esta semana entro en vizyon. Lee: una istorya de la vida real. Me entereso muncho. Una mujer, fotografa de gerra. Una vida ekstraordinarya. En primero era fotografa de moda, despues dyo desizyon de dokumantar el rejim de Nazismo. Afilu era una mujer, afilu ke aviya munchos difikultades a todos los jurnalistos, travo miles de fotografiyas. La dezgrasya, la sufriyensa, los kampos. Ma kuando salyeron estas fotos en medyo, la djente no keriyan mas verlos. Keriyan olvidarsen todo lo ke paso. Olvidar la sufriensa, no avlar, no ver. Ma eya izo lo ke izo, travo estas fotos i las amostro al mundo entero. Su koleborador fue David E. Scherman. (https://www.youtube.com/watch?v=RBVUsK87MME) en este filmo de YouTube estash viendo Kate Winslate kon el ijo de Lee Miller endjuntos komo se aparejaron a travar el filmo. Antony Penrose mos dize: yo syempre pensi si uno va travar el filmo de mi madre kale ke seya K. Winslate. I ansina fue. Winslate avlo kon Antony Penrose i kon la inyeta de Lee, Amy Bouhassane miles de oras. Fue munchas vezes a la kaza de Lee para konoserla de sus fotos, bushko detalyos i se adapto a su rolo muy bueno. Lee Miller tiene travado una foto en kaza de Hitler aryento de su banyo ke es muy famozo, i en este filmo de YouTube estash viendo la razon de travar esta foto ansina.
Aparte de K. Winslate djugo el aktor Andy Samberg al famozo fotografo de Life David E. Scherman, Alexander Skarsgård en el rolo del pintor Ingles surrealisto, fotografo, poeta i eskrivano de biografias, el marido de Lee Miller, Roland Penrose. Este filmo es el primer filmo ke travo el direktor Ellen Kurras. Los produktores son Kate Solomon i Kate Winslate. Este filmo se pudo realizar en ocho anyos. La avyertura mundial fue en Septembre de 2023 en el Festival de Toronto. Agora se esta amostrando ande mozos. https://www.youtube.com/watch?v=EtW61M0lnvs i este video es la vida reel de Lee Miller.
Mas i mas, una artista famoza Turka ke era la idola de muestra chikes mos desho la vida buena. Filiz Akın. Kon sus djilves, kaveyos blondos, ermoza, metyo su nombre a una epoka. Ke su alma repoze en Ganeden.
