SESH MUJERES EMPORTANTES KE SON AFIRMADAS EN LA ISTORYA MONDIAL

            Komo kada anyo fyestimos en el ocho del marso

“EL DIA ENTERNASYONAL DE LA MUJER”. Estas mujeres djugaron un rolo emportante en los akontesimyentos de la istorya de la umanidad en espasyos diferentes i emportantes.

            ADA LOVELACE: La primera programadora de enformatika del mundo. Grasyas a su entelijensya briyante el titro de primera programadora ya es un nombre ke merese.

Eya nasyo en 1815 en Londra, es en mizmo tyempo matematisyana i eskritora ingleza.

Ada es konosida komo analitika en makineriya, komo analista i metafizisyana. Las notas inisyales son muy emportantes en la istorya del kompyuter ansi ke eya desvelopo una vizyon sovre las kapachitades de los kompyuteres, para pueder ir mas aya de la komputasyon intensiva. En jeneral, eya kestyonava los supuestos bazikos sovre la kombinasyon de la poezia i de la siensya.

            MARIE CURIE: Eya nasyo en 1867 en Varshova i en 1891 se fue a la universita Sorbonne para estudyar fizika i matematika. Se konosyo kon el profesor de fizika, Pierre Curie i en el anyo 1895 se kazo kon el. A Marie Curie devemos la enformasyon de munchas teknolojias i en partikular, a la produksyon de la enerjiya nuklear aktual. Munchos sientifikos ke nunka verian en sus vidas, eya gano el “Premyo Nobel” de Fizika en 1903 i el “Premyo Nobel” de Kimika en 1911. Eya fue la primera mujer ke fue el miembro de la fakulta de la Universita de Sorbonne. Los lavoros de madam Curie fueron muy emportantes en el tratamyento de la hazinura maldicha del Kanser aktual.

    HELEN KELLER: Nasyo en 1880 en la Amerika. Kuando teniya 19 mezes paso una hazinura kon una kayentura muy alta. Por esta razon, peryo la kapachita de ver kon sus ojos, de oyir kon los uyidos i la avla.

Ma, nunka peryo su sentido de kuryozidad. Kon los esforsos de su famiya se ato a la vida i kon los esforsos de su famiya, se konosyo kon una profesora, Anne Sullivan. Anne le ambezo kon el sentido de tokar, la metod para ambezarse las palavras. Esta enformasyon troko enteramente su vida. De este momento en delantre Hellen Keller no solo se mijoreo, ma tambyen eskrivyo munchos livros i dyo konferensyas para ayudar a las personas kon diskapachidad en todo el mundo. Tuvo un grande rolo en el establesimyento de munchas institusyones en la aktualita.

Era una pedagoga i aktivista amerikana ke avlava sinko linguas. Ingles, fransez, aleman, ladino i ruso.

Sus sitasyones son:

• La vida es una aventura ke se bive kon koraje o no es nada.
• Kuando se serra una puerta de la felisidad, se avre otra.
• Aunke el mundo esta yeno de sufriensyas, la alegriya de bivir peza mas muncho.
• Las mas ermozas kozas de la vida no se ven kon los ojos, i no se tokan. Kale sintirlos en los korasones.
• Si la vida era yena de felisidades, nunka no mos puediyamos ambezar el koraje i la pasensya.
• Una persona ke torna su kara al sol, no ve solombra.

MARGRET HAMİLTON: Eya eskapo el departamento de matematika i kontinuo a la filozofia. Eya permetyo al ombre de dar sus primeros pasos en la luna. Estudyo la enformatika, es injenyora de sistemas. Fue la primera programadora ke tuvo lugar en el proyekto de “Apollo”.

     AMELIA EARHART: Su mas grande esfuenyo era bolar. Eya paso a la istorya en realizando este esfuenyo. En primero se desido de azerse enfirmyera volontarya. Konosyo munchos pilotos i se ambezo komo se aze piloto en tomando lesones de bolar. En el anyo 1932, fue la primera mujer pilota ke bolo sola en el Oseano Atlantik, i fue muy renomada.