Kuzgundjuk es un kartiye ke se topa al bodre del Bosfor, por la parte asiatika. Antes moravan aya munchos munchos djudios. Las kazas de Kuzgundjuk eran kaji todas de tavla. Lo mas de dos, o en vezes de tres kates. Yo vos va kontar una aventura ke paso antes 50 anyos.
En una kaza de tavla de dos kates moravan dos famiyas djudiyas. Ariva morava Mosyo David kon su mujer i dos ijikos i abasho morava Mosyo Sabetay kon su ija, Virjini. La madre de Virjini ya se aviya murido i eya morava kon su padre. No era kazada, no aviya topado un mazaliko.
Un diya se oyo unos gritos i chiyos del kat de abasho. Atyo ke esta afitando? Pishin David abasho abasho, i su mujer detras. Las puertas de las kazas eran komo puerta de kamareta. Avriyo la puerta, i ke vido? Mosyo Salvator asentado en su fotolyo en la kyoshe de la kamareta, delantre la ventana. I Virjini estava suvida ensima de una siya, gritando: “Ayyyyy ayyyyyy mosyo David, salvame! Arondja este raton de la kamareta”. En verdad ke aviya un raton en medyo la kamareta. Todos mos espantamos de esta bestia. Aparte ke kontiene munchas hazinuras, lo ke mos espanta es por ke se deplasa muy presto. El raton poveretiko, en lo ke lo vido a mosyo David, se fuyo. Virjini ampeso a yorar. Estava muy inyervoza kontra su padre. “Mosyo David, le dishe a mi padre ke arondje este raton de kaza. Ma el no se domeyo de su kanton.” Mosyo David le demando a Mosyo Salvator: “Salvator deke no arondjates el raton. No es pekado? Se estava espantando tu ija, Virjini”. Kon muncho kalmo le respondyo mosyo Salvator. “A mi ke me sale? Deke ke me dezrepoze de mi lugar. El raton no me estava mirando a mi. La estava mirando a Virjini. Madem la estava mirando a eya, eya ke lo arondjara!”.
Despues de kalmarla, suvieron mosyo David i su mujer ariva a sus kazas. I todo kontinuo komo antes.
