En los payizes ande la majorita del puevlo son muzulmanos las dos fiestas - la fiesta de Ramadan o la fiesta de las dulsuryas i la fiesta del kodrero ande se degoyan los kodreros (komo sakrifisyo) - son las dos fiestas emportantes para el puevlo. I el Şalom no parese solo en estos dos Bayrames. I en los diyas ke vyenen vamos a fiestar el primer Bayram. Ay munchos anyos ke no topi la okasion de vijitar la kapitala de la Fransia i mos vamos irmos kon mi mujer a Paris. Devo de vijitar munchos lugares. Puedeser vos va kontar syertos de estos.
La semana pasada bivimos syertos evenimyentos en muestro payiz. En primero la Universitad de Estanbol anulo el diploma del mayor de Estanbol kon syertas razones. Ma mi opinion es ke no son muy reeles. I kon este evenimyento pensan ke no se puede azer prezidente de la Republika. I dospues organizaron syertas shenas para dizir ke estan organizando syertas kozas para ayudar los teroristos, i para rovar syertas paras. No savemos lo ke es djusto. I el partido de la opozision organizo syertas aktividades en la Munisipalidad de Estanbol para protestar esto todo. I serka de 600.000 personas asistyeron a estas manifestasiones. Diya de Alhad organizaron una eleksyon en el partido para eskojer el kandidato para el Prezidente de la Republika. I Ekrem İmamoğlu, el mayor de Estanbol fue elijido. Ma de otra vanda esta en prezo. El partido de la opozision esta yeno de ambision. Si tyenen razon estan oy en diya bastante fuertes. Bivir i ver, vamos a ver lo ke va afitar en muestro payiz.
Esta semana unos kuantos miembros del grupo “Kazika “ me demandaron si puediyan topar el diksyonaryo “Judeo-Espanyol /Turko i Turko / Judeo-Espanyol” ke fue publikado 28 anyos antes por un grupo formado de 5 dammas “Klara Perahya, Ruti Meranda, Suzi Danon, Regine Sadaka i Çela Zakuto”. Ke sus almas repozen en Gan Eden de Klara i Regine. Estan en Ganeden, Ruti i Suzi en Israel. Es solo Çela Zakuto ke se topa en Estanbol. I ize una seria de fotokopias. Los ke keren pueden merkar este livro en el Sit de Internet del Sentro Sefaradi. Un syerto tyempo tenemos un presyo promosional para los miembros del grupo. Malorozamente no publikimos el segundo volum “Turko/ Judeo-Espanyol” del diksyonaryo ke fue imprimado por Klara Perahya: “Judeo-Espanyol /Turko” .
Ay dainda muncho de azer. Ma devemos de lavorar muncho. Para el diksyonaryo, eskrivyendo kada semana mi artikolo esto topando biervos ke no egzisten i los esto eskrivyendo. Devemos de lavorar para tener un diksyonaryo mas ancho.
