Fine Dining no es solo komer, ma tanbien bivir una eksperiensa. Estas komidas ke se ofren en los restorantes muy luksuozos, son echas kon ingredientes de alta kualidad, tienen prezentasyon sofistikado i son kombinadas kon un servis perfekto i ofren momentos inolvidables a sus klientes.
Los restorantes de Fine Dining ofren komidas de los mijores ingredientes. Los shefes empleyan teknikas klasikas ke kombinan kon varyasyones modernas i aparejan platos kreativos.
La prezentasyon de la komida es tan importante komo la savor. La forma ke se aranja el plato, la armoniya de las kolores i las prezentasyones minimalistas son la parte esensial de la eksperiensa Fine Dining.
En estos restorantes el servis es elegante i profesional. Los garsones tienen grande konosensya sovre los platos i los vinos o las beviendas ke van kon eyos i dan una atansyon espesiyal a kada kliente.
La dekorasyon i el aranjman de las mezas, la luz, la muzika forman el atmosfer del restorante. Se puede dizir ke es una ambians luksuozo i elegante.
Los restorantes Fine Dining ofren menus de “degustasyon”, kon munchos platos chikos para dar a los mizmos klientes la oportunidad de aprovar savores diferentes. Los sommeliers (ekspertos en vinos) rekomendan los vinos los mas apropriados kon el plato ke ordeno el kliente.
En todo el mundo, los restoranes fine dining son evaluados por el “Gia Michelin”. Las estreyas Michelin, son onores dados a los restorantes sovre su arte kulinaryo, kreatividad i servisio de alta kalite. Los restoranes ke tienen una, dos o tres estreyas son konsiderados komo los mijores en el mundo gastronomiko.
Las porsyones de Fine Dining son muy chikas i los presios son bastante altos. No es para artar ma es para tener una idea de la kualidad. Esto tiene munchas razones. Los restoranes Fine Dining uzan ingredientes muncho mas spesiales i karos ke los restorantes ordinarios. Ingredientes de lukso komo la trufa, el kavyar beluga o kezos de produksyon espesial, azen el presio alto.
Los shefes disenyan kada plato komo una ovra de arte. Estas komidas toman muncho tiempo i teknikas spesialas, lo ke ogmentan el presyo. Munchos restorantes Fine Dining vos ofresen un menu “degustasyon”, kere dizir “para gostar”. En estos menus se topan munchos chinis, kon poka komida. Aki no se arta ma se deskuvren munchas savores muevas.
Si keresh artarvos, andavos a restoranes “casual dining” o “gourmet bistro”. Ma si keresh aprovar Fine Dining, vash a topar una savor i una estetika kompletamente diferente.
En kurto vash a pagar muncho, para komer poko i no artar.
