Este tema ke se melda antes de Pesah en la perasha Hukat es unas de las mas difisil a entender de la Tora. Para entender este teksto, kale antes de todo akodrar ke ay 3 modos de Leyes:
- Edut, ke son Leyes konosidas komo guadrar el Shabat.
- Mishpatim, komo son Leyes umanas komo no roves, no mates.
- Hukim, Leyes donde no se entyende el sensyo, ni el demenester de estas Leyes, ma ke somos ovligados de akseptar i pratikar. La Vaka Ruvya es una de este modo de Ley. Su sensia es bazada en el tema de purifikasion de antes de Pesah. La Tora mos prezenta la Vaka Ruvya en una fraza. El Sinyor del mundo yama a Moshe i Aaron i les ordona ansi: “Toma una Vaka Ruvya sin un defekto, sana, ke nunka no estuvo en dinguna servitud ovligada. (Esklavaje) El Kohen Eleazar la va tomar, la va yevar afuera del kampo, la va degoyar i la va kemar. El Kohen Eleazar la va kemar kon yervas de (Zufaf), el lenyo del (Sedir) i un ilo korolado ke va echar al fuego. Despues va tomar la siniza de la Vaka, la mesklara a la agua afuera del kampo, en un lugar limpyo. El Kohen ke akomplisio esta misyon, kedara enkonado fasta la noche. Se va lavar el i sus vistidos, antes de tornar a su Misyon". Este orden, esta Ley fue dada en el Dizyerto i aplikada en el tyempo del Bet Amigdash, i kontinuo fasta la destruksion del Templo Sakro. Agora analizaremos el sensyo sekreto de esta fraza “Los ijos de Israel tomaron una Vaka kon sus proprios bienes” Una Vaka Ruvya sin defekto, komo era Israel antes de kometer el pekado de la Vaka de Oro. El puevlo aviya echado el atamyento a la Ley. Daran la Vaka al ijo de Aaron Eleazar porke en el pekado de la Vaka de Oro, Aaron aviya kedado kayado. “Eleazar kemara la Vaka kon una yerva spesial ke krese en basho, lenya de Sedre, arvole alto, kale ke se aboke delantre la Ley. Ilo kolorado ke la kolor se obtyene de un chiko guzaniko ke se arasta en la tierra. Dunke no tendremos grandeza, i mos enkorvaremos komo el guzaniko, delantre las alturas de la Ley Santa, ke mos dyo El Sinyor del Mundo. Estos elementos mostran ke la grandeza i los pekados se deven de ser abatidos.
Diya de Kipur, solo el Kohen Agadol entrava a la Tenta Sakra. La Vaka Kolorada es el sembol de la fuersa material, i la kontra del blanko, ke es puredad. Para entender mijor, kontaremos una istorya ke se raporta: En el Palasyo del Rey, entro una kriyatura ke enkono, ensuzyo el lugar, i la madre alimpyo lo ke embatako su ija…
Ansi la Vaka Ruvya es en opozisyon del pekado ke kometyeron los ijos de Israel en el Dizyerto en frente del Monte Santo.
La Vaka Ruvya se melda antes de Pesah en Nisan en la primavera, se melda tan bien en la Perasha de esta nombre. “Envita, yama a todos ke esten limpyos de puerpo i de alma".
Despues ke se destruyo el Bet Amigdash, la lektura de la Vaka Ruvya mos akodra las Leyes de impuredad i limpyeza ke kale observar en kada kaza de Israel.
Oyeremos la boz Santa ke mos dize: Vos va dar una mueva alma, te vas a olvidar del materyalizmo i ansi seras mi puevlo, kamino de esperansa komo dize de Terah a Avraham, de Ahav a Ezekiel, de Amron a Yeushua “Entre todos los puevlos, tu seras mi Kavretiko.” Despues del invyerno la primavera, despues de la tristeza la alegriya, despues de los kampos Nazis la Geula. Despues de la oskuridad, la Luz briyando, despues de los evenimyentos tristes, un mundo de Pas i Amor.
Hag Sameah para todos, keridos lektores, Pesah Alegre.
