Malorozamente ay unos kuantos anyos ke no me vo a Paris. La mas grande razon es el Covid ke mos komio la vida durante tres anyos. So el ijo de una Pariziana. I sus parientes orijinarios del Imperio Otomano bivian en Paris. I kuando era chiko syertos enveranos mos ivamos a Paris. Mi ermana Rina i yo, mos kedavamos en la kaza de mi granmama i granpapa. Era un lugar muy atraktivo. En frente avia el Monoprix. I es aya ke vide por la primera vez en mi vida las eskaleras ke kaminan, 65 anyos antes. I dospues ke eskapi mis estudios i empesi a lavorar, estava en los echos de ilos. Dainda tengo una fabrika ande azemos la produksion de diferentes ilos. I empesando de la segunda mitad de los anyos 80, kada anyo me iva a la ekspozision de ilos ke se realizava en Paris en junio i en disembre. Las dos mijores periodas del anyo. En disembre antes de Noel i del Muevo Anyo. Kada lugar i magazen aklarados. I en junio, las kayes se eskuresian a las mueve o a las diez de la tadre. Reelmente diyas largos. Los 40 anyos dalkavo kreo ke vijiti a lo manko 50 vezes esta sivdad. I ay munchas kozas ke me plazen.
Oy en diya tenemos el facebook. I si eskrivish syertas kozas sovre Paris, kreo ke puedesh topar un alay de lugares ke no vitesh asta agora. Keriamos vijitar kon un vaporiko el Canal St Martin ke se va serka de la Place de la Republique. Ma malorozamente no pudimos topar un lugar en este vapor. Todo kon internet. Si no ugrasheas kon el internet no puedes azer nada. Un diya dospues mos fuimos al “Musée de l’Orangerie” ke se topa en el Jardin des Tuilleries. Reelmente estava una maraviya kon el arte de Paul Monet. Es el mizmo diya ke me rovaron el telefono. Una desgrasia. Desgrasia en Paris; desgrasia dospues ke torni a Estanbol. Solo para reglar los kuentos de las bankas! Kon la mueva karta sim, dinguna banka no vos aze dinguna operasion en el internet. I komo so responsavle de 3-4 firmas komersiales i de 4-5 asosiasiones i fondasiones, esto todo fue muy difisil. A la fin lo regli.
Antes de ir a Paris lavori 2-3 noches para topar buenos restoranes. I reelmente mos fuimos a tres restoranes ke mos plazyeron muncho. Mizmo si no eran klasados por Michelin los dos eran restoranes ke resivieron syertos premios. Vos djuro ke en un restoran mos trusheron una karne de serka de un kilo. Oy en diya kon los presyos de Estanbol no es posivle de komer un plato asemejante en un restoran.
La maale Djudia se topa en el kuarter “le Marais”. Es por la primera vez ke vijitimos oras enteras este kuartier. Mizmo komimos un falafel. I merkimos un paketo de matsa kon vino i sumo de portokal. Paseando en los Champs Elysées el mas grande trokamyento fue el magazen Galeries Lafayette ke se avrio al lugar de Virgin ke era el mas grande magazen de CDs i de discos en Paris, mismo en Fransia. El segundo trokamyento fue el muevo magazen de Louis Vuitton ke restoro un grande batimiento komo una validja de Louis Vuitton. Esto esta influensando toda la djente ke pasa por la kaye.
Un grande trokamyento en los franseses. Antes no keriyan avlar en inglez. Oy en diya no keren avlar en fransez. Les avlas en fransez, te responden en Inglez!!!
