Se puede dizir ke esta seria de televizion es la mas orivle de muestro tiempo. Kreygo ke todos los djenitores de los adolesentes se van a atemar en viendo esta seria.
La estoria entera esta divizada en kuatro partes, ke reflektan los kuatro prosesos de la travma: shok, negasion, akuzasion, akseptasion.
En la primera shena la polisia esta entrando a la kaza de Jamie Miller, un mansevo de katorze anyos, i lo esta arestando por modo de una sospecha de asesinar su kompanyera de klasa, Katie, una noche antes. Los dos primeros epizodes mos esta yevando al mundo de la komisaria. Los dedektives estan konstruyendo el procheso kontra Jamie. Jamie esta inyegando su kulpa.
En el primer epizodo, el padre esta profondamente sarsaneyado de la pretansion ke su ijo kometio un asesinato i imediatamente esta defendiendo su ijo, pensando ke su ijo nunka kometeria una atrosidad asemejante, porke komo kada padre esta pensando ke su ijo no puede, ni deve ser un asesino. Ma la inkredulidad del padre se esta konvertiendo en una dolor inimajinavle duspues ke esta viendo la evidensia del krimen en un video. Ver las imajes de su ijo enfinkar el kuchiyo asta la muerte a su kompanyera de klasa, fue una eksperiensia muy doloroza por el padre.
En el segundo epizodo, estomos viendo los konfliktos entre los kompanyeros de Jamie i sus djenitores desde la perspektiva del sistema edukativo, i estamos entendiendo ke el tema del filmo es un problem de sistema i no un asesinato infantil.
El dialogo entre los mansevos esta amostrando ke estan kreendo ke tienen el derecho de asperar i resivir de las ijas. El dedektivo esta entendiendo el "deke" del asesinato kuando su propio ijo adolesante esta traduizando los emojis en los komentarios de Katie i de Jamie. El mundo de la kultura "incel" es el mesaje entre los mansevos.
El treser epizodo konsiste de una sesion entre Jamie i una psikologa infantil enbiada para realizar la evaluasion independente antes del procheso judisial. La psikologa lo esta provokando a Jamie i lo esta aserkando a las verdades ke no kere akseptar. A las vezes lo esta punchando.
En el kuatren epizodo, Jamie esta telefonando a su padre para dizirle ke se desido de konfesar su krimen. Unos kuantos minutos despues, marido i mujer estan asentados en la kama de Jamie demandandosen si son kulpavles por lo ke izo Jamie. ‘Devia azer mas’ esta diziendo el padre de Jamie.
