Todos ke me konosen ya saven ke me plaze muncho viajar i konoser diferentes kulturas. Un dia kaminando en la kaye, vide una bandera ande aviya una promosyon de una firma de avion a Batum, ir i vinir $99. Sin pensar, aparti lugar. Despues aparti al otel Intourist Palace. Kuando arivimos al otel de Batumi, le demandi al direktor del otel si mos puede ayudar para topar un gia. Keremos azer un tur de la sivdad kon gia. Mos topo i el sigundo diya ke estavamos en Batumi, empesimos a kaminar i tomar enformasyon por Georgia. El tur empeso de la guerta Botanika. De aya vinimos a la Plasa ke se yama Piazza. En este sentro aviya la Iglesia Ortodoksa St. Nicholas, la Iglesia Gregoryan Apostolic i la Iglesia Katolika de Batumi. Esta plasa Piazza es la sivdad vyeja ke se yama Old City. De aki en abashando para el bodre de la mar vimos la meshkita ke se yama Orta cami. De aki vinimos a la muraya ke se yama Asparos. Es del tiempo de los Romanos i de Bizans. Al otro diya kaminimos los lugares serkas ke se puede kaminar solo. Komo el teatro Sevavadze serka de aki en la plasa aviya el monumento ke es Altın postlu koç. En el bodre de la mar se topa el monumento ke es el sembol de Batumi Ali & Nino la estorya es muy enteresante de esta monumaento. Es una estorya de amor de un muslumano i una ijika kristiyana. otro munumento se topa aki ke se yama Alfabe kulesi. Vineremos al kavzo dela gastronomiya de Georgia. En kaminando mos ambreyimoz i mos fuimos a un restorante ke se yama White Restoran. Muy enteresante una arkitektura, Kale ke entrej al internet i ver komo de koza es. Kuando vino el garson le demandimos kualo es la espesyal delas komidas Georgia. Mos konto Primero viyene el Hachapuri ke es una pita kon kezo i ensima se mete guevo.mas de esto Lobiani, Khinkali, Niguziani Bodrijani. En kosyendo meten aryento frutas komo Bimriyo, agranada, avramila i muncho ajo. En komyendo beven kada vez Vino. Antes de bever azen un rituel ke se yama Tamada.
Komo kada vez, viniremos al sujeto ke es las salatas. La salata spesyal de aki es Salat Kartuli. Los materyales komo kada salata son konosidos ma la sos estava muy enteresante; vos dare la resefta.
Materyales
2 Tomates
2 Pipinos
1 Pipirushka
1 Sevoya kolorada
5 Ojas de Kishnish
5 Ojas de Reyhan
Por la sos
2 dientes de ajo
50 gr Muez
1 Kuchara de pimyenton kolorada pikante
2 Kucharas de supa de vinagre
1 Kuckara de spesia spesyal de Georgia ke se yama Hmeli Suneli (Si topash)
½ Kupa de chay de agua
Sal
Aparejar
Los materyales se aprontan komo choban salatasi i se meten en un chini ondo.
De la otra parte los materyales de la sos se meten aryento del Rondo i se karishtereyan i se aze komo un clodo i se mete ensima de la salata.
