Pesah es la fyesta de la libertad, de la independensya. Mos aze akodrar la salidura del esklavaje de Misrayim. Muestros padres se apatronaron de sus identitades en luchando.
Pesah es el nasimyento de la nasyon djudiya. El mez de nisan es el primer mez del kalendaryo djudyo ke da el haber de la primavera.
Todas las famiyas se arekojen en el doredor de la meza de seder i se akodran de esta leyenda de sus ansetros i transferan la istorya de djenerasyon en djenerasyon.
Esta fyesta tyene dos nombres diferentes: PESAH i HAG HA MATZOT.
Pesah mos aze akodrar la proteksyon santa mirakuloza ke en la katastrofa, Dyo detuvo a los ijos de Israel leshos de las belas.
Hag ha Matzot mos akodra ke en esta semana sakra, vamos a komer solo matsa ke se aze de la arina sin levadura.
Las dos primeras noches se beve el vino korolado porke, el vino es el simbolo de la felisidad i korolado es el simbolo de la sangre.
Las fyestas son las okazyones de aunar a todos en el entorno de una meza. Madres, padres, ijos, ijas, nonos, nonas, inyetos, inyetas, tiyos, tiyas, kosfuegros.
Todo el umanizmo se apanyo a los pasos lokos de la vida moderna. Todos estamos koryendo, para un buto, i siguramente las oras i los diyas no mos estan abastando. Mos estamos olvidando de vez en kuando ken semos, i no mos estamos puedyendo apartar un punto libero.
En bivyendo esta manera, tenemos mas muncho stres, mas muncha inkyetud en todo modo de punto de vista. No kale ser tanto asigidos!
Los mansevos keren tanto alkansar a sus butos, ke se estan olvidando de las famiyas, de sus keridos. Para eyos lo ke es emportante son los amigos.
La famiya es la baza de la komunitad, de la sosyedad. La famiya determina el avenir de la sosyedad kon los faktos, de la kerensya, del respekto, de la tolerensya, de la solidaridad, de la unyon, de la ermandad, de la amistad, del amigavle. Estos faktos son emportantes por la umanidad, i se forman en la famiya.
La famiya tyene un rolo emportante en la formasyon de la personalidad. Las reunyones de famiya kontyenen todos los myembros de la famiya, para pueder avlar, sintir al den frente, para azer planos, para pueder eksprimir los sentimyentos, las keshas, las preokupasyones, para pueder rezolvar los pletos, i para pueder planifikar los divertimyentos de la famiya.
Seder: es la regula de la meza ke se apareja en las kazas djudiyas, por la noche de fyesta kon muncha aplikasyon. En la meza se topa: los livros de la Agada, vazos de vino para todos i un plato espesyal de Seder.
Se mete enriva de un tifsin: un guevo haminado, tres matsas enteras, un pedaso de kodrero kemado, haroset, karpas i maror. Esto todo tyene una sinyifikasyon aparte.
Mizmo ke es una fyesta muy kanseryoza para la balabaya, porke eya empesa a aparejarse de una semana antes para pueder eskapar a tyempo; es una felisidad grande, de arekojer 15-20 personas de la famiya akeya noche.
Kuando se termina de komer, kada uno i uno avla una koza diferente, se avla, se riye, se kanta i se pasa momentos spesyales todos endjuntos.
Lo ke arogamos es de ser syempre aunados, i pujados i non aminguados.
HAG PESAH SAMEAH, i PAS i REPOZO en la Tyerra de ISRAEL, AMEN.
