Ay 50 mizmo 60 anyos ke kada fiesta de Pesah se avlava de la matsa ke esta godra, ke no esta bastante tostada, un alay de problemes. Kuando era prezidente, un diya el Rav Mendy estava en el orno de matsa, i estava mirando en kuantos puntos estavan aziendo la produksion de una matsa. I si paso 2 o 3 segondos al chop. Una desgrasya. Şapat Aviyente era responsavle de los echos relijiozos. Teniyamos de azer un viyaje a Israel i le dishe, toma un randevu kon unas kuantas fabrikas de matsa, i rezolvaremos este problem. I en el viyaje mos fuimos un diya a Petah Tikva i vijitimos la fabrika de “Aviv Matsa”. Estavan fabrikando krakeres en las mizmas makinas. En Estanbol por toda la Turkiya fabrikavamos la matsa i la arina en 4 mezes kon un alay de djente. En primero le di la kantidad ke keremos i le demandi en kuantos diyas fabrikan esta kantidad. Me respondyo, en vente oras. Torni, i dishe a Şapat “no vamos a fabrikar mas en Estanbol”. I el patron de la fabrika mos esta demandando si puede merkar arina de Turkiya. Porke el anyo ke vinia era el shabaton de los kampos. En Israel se sembra 6 anyos i el syeten anyo no se sembra. I es muy difisil de merkar trigo i de azer arina por la fabrikasion de matsa i otras kozas. Avlimos dospues por los presyos de la matsa, de la arina mizmo de las matsas kon shokola…
I tornando a Estanbol vimos ke la kantidad permetida era limitada. El primer anyo merkimos de la Ukrania. I empesi a telefonar al Ministerio de los Echos para ke pujen la kantidad de matsa ke se puede importar de Israel. Muy difisil. Telefoni kreo dyes a 15 semanas i a la fin reushimos a tener la kantidad menesterosa. I es dospues de esto ke estuvimos importando de Israel todo lo ke tenemos de menester.
Asta kuando? Asta este anyo. Dospues de los evenimyentos del 7 Oktubre, las relasyones entre la Turkiya i Israel no fue lo mizmo i 7-8 mezes dospues todo modo de artikolos Israelyanos fueron defendidos en Turkiya. I la kompanyia Denet ke es responsavle de este echo, importo de las Amerikas. I tomaron un papel ke la ropa no komporta GMO. Ma no fue este modo. Kuando la duana embiyo la arina de matsa al laboratuar toparon GMO adyentro. I la arina fue destruida. Kualo izyeron? Importaron una tona i media de la Fransia, i de la matsa Amerikana fabrikaron arina de matsa. Ma si se dize ke ay problem, todos keren merkar mas. I esta vez kitaron las matsas i las arinas ke kedaron del anyo pasado. Todos se estan keshando; por la matsa, de ke no ay bastante? El prezidente İsak İbrahimzadeh mizmo embiyo a uno para ke merke 50 paketos de la Gresia. Diya de vyernes me fui por un korte a la Sinagoga de Şişli i me estan dando un paketo de matsa. Les dishe ke no tengo de menester. Ma me dyeron zorla.
No vos olvidesh. En muestra istoria tenemos uno o dos anyos ande no tuvimos matsa. I las kondisyones no eran las mizmas. En esta epoka no se puediya importar en unos kuantos diyas.
Yo kero rengrasyar la Kompanyia Denet, su direktrisa, Jinet i todos los ke lavoran en Denet, i al prezidente İbrahimzadeh ke izo munchos esforsos para salvarmos de este problem.
Hag Pesah sameah…
