Sesh ombres salyeron endjuntos a kortar arvoles de la shara para azer lenya. El tiempo estava maraviyozo. Lavoraron unas kuantas oras i kuando eskapo sus echos, en supito el tiempo troko. El sol se desparesyo, salyo un ayre i peryeron el kamino de tornar. Se kedaron en un lugar i ampesaron a pensar. El uno disho: “Deviyamos de tornar a la siedra, el kazal muestro se topa a la siedra del boske.” Sovre esto el tomo su lenya i se fue por la siedra.
El sigundo disho: “Yo digo mos iremos por la derecha. Se ve luzes briyantes. Posivle ke avera algunos ke mos ayudaran a topar muestro kamino. Vini kon mi”. El tomo su lenya i se fue por la derecha.
El treser disho: "Yo vo tornar direktamente para atras, ke esto siguro ke vinimos por akeya parte. Mi kaza i mi famiya es mas emportante para mi ke ganar paras.” Sin pensar, echo su lenya en basho, i torno atras.
Al kuatren, le plazyo la lenya ke desho el treser, disho: “De agora en delantre esta lenya me apartiene. Va kontinuar adelantre kon las dos kargas de lenya, por siguro ke va enkontrar algunos en este diya tanto friyo, ke van a kerer merkarme esta lenya”. I se fue adelantre.
El sinken ombre vido un arvole alto. I disho: “Me suvere ariva i mirare puede ser ke topo la direksyon ande devo irme.”
Solo el sejen ombre se kedo ande estava, pensando: “Ke bovedad, lo mijor es asperar ande esto asta ke mos mandan ayuda. Siguramente alguno ke va pasar me va apersivir i me va salvar”. Se arimo al lado de su lenya i se durmio profondamente.
Agora miraremos lo ke les akontesyo despues, a estos sesh ombres.
El primer ke se fue a la siedra en supito se topo aprezado aryento las yervas kon punchones. I ensima de esto teniya de gerreyar kon los animales salvajes. Ansina se ambezo komo kedar en vida aryento una shara. Despues ke topo su kamino, les ambezo a todo el kazal.
El ke se fue a la derecha se enkontro kon bandidos. Los bandidos kijeron arovarsen todos sus bienes. Ma el les arogo ke kon estas paras le iva merkar a su ijika una kukla ke estava asperando desde muncho tiempo. A los bandidos les toko muncho, se akodraron de sus famiyas, le ayudaron a topar su kamino.
El ke se fue derecho topo en su kamino yervas muevas i melizinas. I kuando torno a su kazal se izo el mediko del kazal entero.
El ke se suvio al arvole alto, vido a su amigo, se fue a su lado i los dos endjuntos reusheron a topar sus kazas.
Solo al ken se kedo al lado de su lenya i se durmiyo profundamente, lo komieron las bestias salvajes antes de la madrugada.
La leson ke mos da esta konsejika es: Todos, mos enkontramos kon bastantes obstakulos en muestra vida. Lo emportante es de akodrarmos ke ay diferentes maneras de salir de kada “boske”, i ke kada uno eskoje el kamino ke mas le konviene para alkansar al destino ke kere. Lo uniko ke tenemos de azer es de kreer en mozotros mizmos, en muestra kapasidad i korrer en muestro proprio kamino. Si vuestro ijo se keda ansina inaktivo, kale ke le meldesh este artikolo.
