Un diya dishimos, ya kaminimos kaji el mundo entero ma no mos fuimos dainda a los vizinos. Por esto tomimos al program de ir a Sofya, la kapital de Bulgariya. Aviya treno de Halkalı para Sofya ke en 10-11 oras iva arivar. Dishimos esta vez mos iremos kon treno. A las 10 de la noche salimos al kamino fin ke arivimos la ora se izo 9 de la demanyana. Komo deshimos las chantas a la kaza de AIRBNB ke alkilimos i ande ivamoz a kedar, salimos a kaminar para konoser las kayes. Antes del viaje ya aviya empesado a tomar enformasyones por ande se puede kaminar, ande son los lugares turistikos. Al tur empesimos en azyendo el dezayuno en un kafe. Tomimos Borekes i kafe porke ya saviyamos ke los Borekes de los Balkanes son muy famozos. De verdad la savor estava de chupar los dedos. El program de 2 diyas ya estava pronto i yeno. Ivamos a ver i kaminar munchos lugares. Komo la kaye ke es serrada por el trafiko Vitosha, la estatua de St. Sofiya de ande viene el nombre de la sivdad, la meshkita ke izo el Arkitekto Sinan, Banyabashi cami, enfrente de esta meshkita ande se topa la Sinagoga de Sofiya, el bazar grande ke se yama Central Sofia Market Hall, el mall ke se yama Tzum, ande aviya el restorante Kasher Yerushalayim, el Palasyo de Djustisya, la Iglesia de los Rusos, la Galeria de Arte Nasyonal, el teatro del governo Ivan Vazov, la Iglesia St. Petko, ande aviya la tomba del St. Vasil, la Universita de Sofiya, la kaza del Prezidente de la republika, ande aviya la Iglesia ke se yama St. George ke es el arkitekto komo Rotunda i al merkado de pulgas. La katedral Alexander Nevsky estava una koza de ver. 10.000 personas pueden azer orasyon endjuntos. Lo ke estash meldando ariva vos puedo kontar uno por uno ma el sujeto de la eskriturya es las salatas ke komimos en el mundo. En primero empesare kon la Gastronomiya de Bulgariya. Parese muncho a la Gresia i la Turkiya. Los Burekes, el kezo Kashkaval, i las salatas. Komo la salata de Gresya ke se yama Grek Salat (Horiatiki) mizmo komo la salata turka, Choban salatası, los Bulgares lo yaman Shopska. Komo los Gregos, ensima meten kezo blanko. Mozotros dizimos Djadjik, los Gregos Tzaziki, los Bulgares Snezhanka. Agora vos kontare allado de la komida ke kijimos esta salata mos plazyo i le demandimos al garson la resefta.
El nombre Snezhanka viyene de la kolor ke es blanka mos disho el garson. Aya la yaman a "Pamuk Prenses" Snezhanka. Parese al Tzaziki de los Gregos.
Materyales
500 Gr Yogurt espeso
2 Pipinos kortados grandizikos
½ demet de dereot
2 dientes de Ajo
1 Kuchara de supa de azete de oliva
Para dekorar, 2 Muezes i 1 Kuchara de dulse de menta seka
Sal
Aparejar
Aryento del yogurt se meten los pipinos ke se kortaron kon los ajos i dereot i se karishtereya. Ensima se echa la azete i para dekorarlo ensima se mete la muez ke se partyo en dos i se sarpika la menta. En vezes lo trayen al lado del kebap o solo komo salata o mezelik.
