Despues de trenta anyos, la madre de Mohammed se reunyo kon su ijo ke biviya en Gaza. Mohammed vino a Israel el 4 de Desembre 2019. Mohammed disho ke no se esta kreyo ke yego a este diya. Una noche antes ke venga a Israel, no durmyo noche entera.
Komo una madre puede kontinuar a bivir savyendo ke tiene un ijo en Gaza? Eya no pudo verlo, no pudo komunikar kon el. Deve de ser muy difisil por Rina, la madre de Mohhamed.
Rina se aviya enamorado de un Gazan trenta anyos antes. Tuvo un ijo de el. El padre lo fuyo a su ijo a Gaza. Rina peryo la trasa de su ijo. Mohammed se engrandesyo komo un palestinyano en Gaza. Kuando Mohammed vino a Israel, los jurnalistos le demandaron komo se komportaron los gazanos kon el? “Muy bueno”, disho Mohammed. “Mezmo ke saven ke sos judyo, no te atakaron, no te maltrataron?” “No, nunka. Ay tambien buenas personas en Gaza”, disho Mohammed.
Sesh anyos antes, Rina se desido a bushkar a su ijo. Eya estuvo en kontakto kon la organizasion ‘Yad L’achim’, ke se okupa a topar las mujeres ke se kazaron kon non judyos i trayerlas a Israel.
Un miembro de Yad L’achim le disho a Rina de bushkarlo. Los vizinos de Rina i sus paryentes la forsaron a kontaktarlo. Eya no se estava kreyendo ke iva pueder reushir.
“En Yad L’achem, tomimos este kavzo kon kuatro manos. El kontakto kon su ijo se izo kon grande atansyon para ke dingunos no sepan. En primero deviyamos de verifikar su identidad para saver si esta persona era la persona ke estavamos bushkando, i kuando estuvimos seguros, empesimos a azer los prosesos”.
Un diya, Rina le telefono a su ijo, i le disho ke eya era su madre. Mohammed no se kreyo en primero, i le demando a su tiyo. Kuando se izo seguro ke es su madre, empeso la relasion. En el empesijo, empesaron a avlar kon un traduktor. Entremientes, Mohammed se ambezo el ebreo. “De kualo estavash avlando?” le demando un jurnalisto. “Muestras konversasyones eran sovre la vida, sovre temas de la vida. Kon tiempo, empesimos a azermos mas intimos. Kuando aviya gerras en Gaza, mi madre se estava mirikiyando por mi. Me estava dizyendo ke no salga a la kaye, ke me proteje bueno”, respondyo Mohammed.
Kon la ayuda de la Ley del Retorno i la ayuda de Yad L’achim, reusheron a tomarle la identidad israelyena. Mohammed se estava espantando de vinir, ma un diya le disho a su madre “Aparejame el pasaporto, ya esto vinyendo”.
Segun la Halacha judiya, Mohammed es judyo, ma segun la ley muzulmana, el es muzulmano. “Vas a trokar tu relijion?” le demando un jurnalisto. “La relijyon no es un problem. Lo ke es emportante es de ser una buena persona, no emporta de ande sos”. Kuando le demandaron si sus amigos se estavan enselando ke iva vinir a Israel, Mohammed disho ke ya se estavan enselando porke en Israel ay respekto por las personas, por la vida. Tambien ay echo. Gaza es una grande prizion. El mijor paiz en el Medio Oriente para bivir, es Israel. La djente keren bivir en Israel. “Mis amigos se alegraron kuando les dishe ke me vo ir a Israel. Disheron ke se van a eskarinyar de mi, ma ke iva ser muy bueno para mi”.
Agora Muhammed esta en Israel i bive kon su madre. Esta lavorando. Tiene grandes esperansas por la vida. Su madre disho ke kere ke su ijo se kaze en Israel i ke le trayga inyetos.
