En el anyo 1984 entri al Dostluk Yurdu Derneği. Aya aviya una muy ermoza tradisyon, esta tradisyon era, en los moedes Purim, Pesah i Sukot, Simhat Tora, ir al Azil ke agora se serro i a Barınyurt agora OR-YOM, vijitar a los pansyoneres, alegrarlos i darles un poko de moral.
Aparejavamos skeches, kon kantikas, kon bayles, en alegrandolos a los pansyoneres mos alegravamos i mozos. Malgrado ke se serro el Dostluk, mozos el grupo de teatro i el koro NES, kontinuimos este evento. Esto kontinuo fin la maldicha pandemiya, no estava en muestra mano, era defendido de entrar aya por esta razon, buen karar de tyempo no pudimos vijitarlos.
Este anyo apenas empesimos a lavorar, el koro NES, i muestro kerido konduktor, İZZET BANA, de vista desidimos de ir a vijitar OR-YOM. Reelmente todos mozos ya teniyamos eskarinyo i el 17 de Avril, diya de jueves, medyanos de Pesah, mos fuimos en koryendo. Djusto a las 11 de demanyana todas mos topimos en el salon. Solo las dammas ke lavoran no pudyeron vinir. Los pansyoneres ya estavan asentados byen vistidos i asperandomos. Ke alegriya para mozos.
Esta vijita la ivamos azer en Purim mezmo ma no estavan dispuestos, de sorte ke İzzet aparejo un repertuar de kantikas de Purim i de Pesah, kopyo todas las kantikas i las espartyo a los pansyoneres para ke kanten endjuntos kon el koro. Lo mas de eyos ya las saviyan las kantikas, mos akonpanyaron kon palmas. El program eskapo kon esta kantika: palavras en Djudeo Espanyol por Sophie Hazan de Brooklyn, adaptada por İzzet Bana a la muzika de una kantika turka Üsküdar’a Giderken.
ESTA KAZA ANDE BIVIMOS
LA FRAGUIMOS KON SUDOR
KON PASENSYA I DINERO
ESTA YENA DE AMOR
O KERIDOS DEL OR-YOM
SALUDOZOS KE ESTESH
PARA PASAR LA VIDA BUENA
I TENER BUENA VEJES
ESTAMOS ALEGRES I KONTENTES
EN ESTA KAZA DE OR-YOM
LOS KE PENARON, MUNCHAS GRASIAS
LA MITZVA SERA DE EYOS
SI MOS METEMOS TODOS EN UNO
MUNCHO, POKO PARA DAR
LAS PUERTAS SE AVREN MAS PRESTO
MUNCHOS ERMANOS VAN A ENTRAR.
PARA KADA ANYO KE MOS AYEGE EL DYO.
