Esta semana estamos komemorando el solevantamyento del Geto de Varsovia. Kero darvos syertas eksplikasyones sovre el termo de Geto.
El termo “geto” tyene una triste memorya en la istorya Djudia i una asosyasyon muy negativa kuando se trata de syertas zonas urbanas povres. La etimolojiya del termo vyene de una zona spesifika de la sivdad italyana de Venezia ande la povlasyon Djudia estava instalada. Ma devo dizir ke los linguistas no toparon un konsensus sovre la etimolojiya de la palavra “geto”.
La teoriya popular dize ke vyene de la palavra italyana para “fonderiya”, porke el geto orijinal de Venezia se konstruyo ande aviya una fabrika de fyerro ke fabrikava armas para el governo de Venezia. Otros afirman ke es relasyonada kon la palavra ebrea “Get”, letra Djudia de divorsyo o separasyon. Otros afirman ke vyene de la palavra yiddish “gehektes”, ke sinyifika enserklado. Otros pensan ke deriva del latin “giudaicetum”, ke sinyifika Djudio o de la palavra italiana “borghetto”, ke sinyifika kazal chiko, o la antigua palavra franseza “guect”, ke sinyifika protejar, o, finalmente, del byervo “gettare” ke sinyifika derritir fyerro…
Algunos getos en la Evropa sirvyeron para forsar la separasyon de los Djudios, ke eran konsiderados komo ajenos, de la povlasyon jeneral, otros fueron fundidos para sirvir komo sentros de la povlasyon Djudia.
El primer “geto” se establesyo en Venezya el 8 de Iyar de 1516, ke es el 10 de Avril. (Una de las razones para eskrivir sovre esta tema!). Despues vino el edikto del Papa Paul IV del 14 Julio 1555, “Cum nimis absurdum”, ke implemento restriksyones a la vida Djudia en la Italia de la Ronesans. Komo rezultado del edikto papal, los Djudios tuvyeron ke vistir un sinyo amariyo (chapeyos amariyos para los ombres o esharpa amariya para las mujeres) komo sinyo de identifikasyon relijyosa-etnika, se metyo limitas a la propyedad Djudia i a su partisipasyon en el komersyo i bankas. A los Dudios se defendyo tambyen vender artikulos vitales para la vida (i.e. alimentos). Komo rezultado, los Dudios se alesharon de echos de moneda, i ansi empesaron a ganar sus vidas komo eskidjis, komersyo de byenes de segunda mano o ofisyos de prenda.
Ademas del termo “geto”, los Djudios tambyen se konsentravan en zonas konosidas komo “maales Djudias”. Estos eran ekstensyones de los getos i se topavan en las partes mas poko dezeavles de la sivdad. Egzistiyan getos i maales Djudios en la mayoría de las grandes sivdades de la Evropa, en Ejipto, Marroko, Tunis, China, India, Liban, Irak, Argentina, Brazil, Venezuela, Meksiko, Estados Unidos i Kanada. En Estambol syertos lugares komo Galata, Hasköy, Balat se konosiyan komo maales Djudias.
Antes i durante la Segunda Gerra Mundial, el “Treser Reich” establesyo getos por razones mas inumanos. En los getos, los Djudios estavan divididos entre los ke podiyan lavorar i los ke no podiyan sirvir, los ke en jeneral fueron asasinados de vista. En 1942, los Nazis metyeron en ovra la "Operasyon Reinhard", ke ovligava los djudios a bivir en getos (no syempre establesidos en las zonas tradisyonales ande biviyan los Djudios) i ke fonksyonaron komo zonas de aparejamyento para las deportasyones a los kampos de eksterminasyon.
