El kalendaryo del tyempo es bazado de 2 muevos anyos, Nisan i Tishri. Sigun la filozofiya del oriente leshano, la enerjia del enverano “Yang” es la enerjia “Aktiva” i la del invyerno “Yin “ es “ Pasiva”. Estas dos enerjias kaminan una detras de la otra. En el kalendaryo Ebraiko, el tyempo es una linya ke mos pusha a delantre. El enverano mos akodra la salidura de Ayifto a la salvasion (Pesah), la resivida de la Tora (Shavuot), la vinida de los ijos de Israel a la Tierra Santa, a la Geula (Sukot). En esta linya de kondukta,vemos ke la Tora mos konta la epoka de Moshe Rabenu. En la Tora eskrita (Tora) i en la Tora oral (Talmud) esta eskrita el Enverano.
En la epoka del segundo Beth Amigdash los Hahamim enstoraron las fyestas.
El enverano es la luz, las aktividades del kampo,los arvoles ke enfloresen i la splendor de la natura.
El invyerno mos guadramos del friyo i de la oskuridad.
El enverano Nisan, Mayo, Junyo, Julyo, Agosto, Septiembre son 6 mezes ke koryen verso Tishri, ke komporta Rosh Ashana, Kipur, Sukot, fyesta ke se alarga kon Yemini Atseret, ke son 23 diyas de fyesta empesando de Pesah, el Omer, Shavuot. En este tyempo vemos munchos evenimyentos negativos, el dezeyo de tornar a Ayifto, solevantamientos kontra Moshe Rabenu, i el pekado de la Vaka de Oro, i en tyempos mas serka, la epidemiya ke chafteyo los elevos de Ribi Akiva. Todos estos evenimyentos mos mostran una koza, no estamos prontos para la Geula, la salida del aservimyento kale, komo dize la Kabala, ke aparejemos vazos ke van arekojer las sinteyas santas, kale ke aparejemos muestras almas a aresivir la spiritualidad divina.
En los diyas de Omer, azeremos muestros esforsos, mos trayera kon bueno la luz, sanedad i alegriya. Kontaremos el Omer, purifikaremos muestras almas, i kaminaremos verso Shavuot i fyestas de repozo i de amistad.
Hag Pesah alegre para todos!
