Esto eskrivyendo mi artikolo egzaktamente 3 mezes dospues del 20 Enero, diya ke empeso Trump su mision. Empeso komo una tempesta. Mizmo el biervo “tempesta” no es bastante fuerte para eksprimir su komporto. No desho el payiz de Canada; ni de Gronland; ni del Golfo Meksikano. Por las oras no tomo nada. Antes de vinir al poder menaso a los Palestinianos, a los Iranianos, a los Ukranianos i un alay de otro payizes i disho ke va realizar la pas kon los Palestinianos, i ke van a deshar liberos todos los rehenes. Malorozamento no se realizo. Ay un anyo i medio ke estan bivyendo en el ginnam. Los Rusos estan meneando la kavesa i Trump esta diziendo ke Putin es su amigo ma dingun movimyento. En la Siria se topan 2.000 soldados Amerikanos. I Trump keriya travarse kompletamente de estas tyerras. I no lo desharon. Reusho a travar solo 600 soldados. Yo esto kontente de esta situasion. Espero ke no se pueda realizar; ma no kero ni saver ke la armada Israelyana puede atakar la armada Turka o el kontraryo. Los dos payizes deklararon ke no keren un evenemento asemejante, ma los Amerikanos son muy emportantes en esta situasion. Para akedar las gerras no pudo azer nada asta agora. Espero ke va azer buenas kozas en poko tyempo. Es la segunda vez ke es Prezidente de los Estados Unidos ma no se ambezo ke deve de realizar syertas kozas kon pasensia.
Lo ke afito kon las taksas de las duanas, una desgrasia. Los Amerikanos pyedreron milyardas de dolares en poko tyempo. Kijo azer la gerra finansial kon mas de noventa payizes. Dospues dyo karar de asperar tres mezes i enkontrarse kon los responsables de todos estos payizes para topar un buen kamino. Estamos mazalozos los Turkos, porke izo pujar solo dyes por syen la taksa de la Turkiya. Disho ke no va amenguar la taksa de los Chinezos ke pujo asta 125 por syen. Ma los Chinezos i sus Prezidente del Estado estan bastante kalmos i esta asperando ke Trump pase su kriza de ambision. Los telefones mobiles no se produsen en los Estados Unidos. I antes ke empese la mueva ley, Apple i Samsung embiyaron munchos aviones a los Estados Unidos para pueder vender en este payiz ke es el mas grande konsumidor. Ya se save ke Nike produse la mas grande partida de los kalsados en Vietnam. Nike aze su produksion en los Estados Unidos, China, Malezya, Canada, Turkiya, Japon, Alemanya, Inglatiera, Italya i puedeser otros payizes, ma en las 10 fabrikas ke lavoran en Vietnam aze la produksion de 75 miliones de kalsados spor. Mizmo Nike no save lo ke deve de azer. I Vietnam fue un payiz ke fue taksado bastante alto porke su produksion es barata. En el empesijo son los Amerikanos ke piedreron. I kreo ke van a merkar todo mas karo en los Estados Unidos. Dingunos pueden realizar muevas fabrikas en unos kuantos mezes…
Bivir i ver.
