En la medya noche del 15 de Nisan, mando a dizir Paro a todo el puevlo judyo ke se topavan en la tyera de Goshen ke eyos eran liberos i ke puedian salir de su pais i al punto los judyos ke ya estavan prontos esperando esta ora, se rekojeron, todos kon prisa en el kartier Ramses, i a la manyana, en el kinze nisan salyeron todos los judyos de el Ejipto kon grande koraje i alegria despues de aver estado socheftados en este pais 210 anyos.
La suma del puevlo ke salyeron de el Ejipto era 600 mil almas de ombres de 20 anyos para ariva fina 60 anyos en desparte de mansevos manko de 20 i vyejos mas de 60 anyos i de mujeres i kreaturas i akel diya salyeron tambien muncha djente de otros puevlos ke estavan en el Ejipto i se adjuntaron kon los judyos.
El puevlo Ejipsyano, konosyendo a las kavos la grande endjustisya ke kometyeron kon los judyos en lugar ke tantas buendades ke vyeron de el, i vyendo ke ay Dyo en las syelos ke paga a kada uno sigun su ovra, kijeron afalagarsen un poko kon eyos, i les fueron regalandoles muncha plata i ora i piedras presyozas, munchas kozas valutozas, i les azian demandar todo la ke tenian menester para darles en tal de afalagarlos i ansi salyeron los judyos de Mistrayim, kon muncha rikeza sigun se les prometyo el Todo Poderozo a Avraam kuando le avizo lo ke teniya ke arivar a sus ijos. Salyendo del Ejipto, no se olvido Moshe Rabenu de tomar kon el, el sirkelyo de Yosef, sigun lo enkomendo antes de su muerte. Los grandes del puevlo tambien tomaron kada uno el sirkelyo de los 11 ermanos de Yosef, los kapos de los Shevatim i se los yevaron kon eyos.
