30 Kasım 2021 Salı 20:43

Çanakkale i el Museo de Troya

Dora TREVES Köşe Yazısı
7 Kasım 2018 Çarşamba

Keridas i Keridos,

Oy vos kero kontar de un viyaje a Çanakkale i de una vijita sorpreza a el Muzeo de Troya.

Ay munchos anyos ke los Çanakkalelis organizan un viyaje de eskarinyo a sus sivdad ande nasyeron i bivyeron, para azer una orasyon en el Kal de Mekor Hayim, para azer ziyara a los keridos ke estan en los syelos en Gan Eden. Esta organizasyon muy bien reushida fue dirijada por el Sinyor Selim Moni Varon i los amigos i amigas ke le ayudaron. Ma el kargo entero estava en el. I perkuro muncho para ke seya todo perfekto. Le esto embiyando mil grasyas. Izimoz un viyaje de todo bueno; serka de 180 personas partisiparon. Mi amiga Emel Benbasat ya vos va eskrivir en la lingua Turka kon mas detalyos sovre la orasyon de noche de shabbat, sovre la tefilla de shabbat, sovre el dezayuno. I yo para no azer repetisyon i no enfasyarvos vos va kontar de la vijita sorpreza al Museo de Troya.

El museo dainda no se eskapo por entero de duzudeyarse. Apenas ke ay kinze diyas ke el puevlo empeso a vinir i kaminar. La seremoniya ofisiyal de inogurasyon se va azer en el 9 de Noviembre. Fue una grande oportunidad para el grupo entero de ver este muzeo maraviyozo de 4 etajes, donde se esta mostrando las sivdades de Troya i las sivdades del deredor, los kates (katman) de Troya, del tyempo de Roma, las personas, los arkeologos ke se toparon en la ekskavasyon de estos deskuvrimyentos (bulgu).

Troya se fondo 3000 anyos antes de Jesus, serka de los riyos Karamenderes i Dümrek serka la peninsula de Biga. Aya se konstruyo sanktuaryos (tapınak), monumentos antiguos para los eroes (kahraman) de la Gerra de Troya.

Troya es una sivdad de mitos, de leyendas. El grande poeta Homeros nasido de Izmir eskrivyo la Leyenda Iliyada ke fue kontada de boka en boka. Achakes de esto tuvo una grande fama i fue vijitada por la djente de las sivdades vizinas i se izo komo un sentro de turizmo mizmo en akeyos tyempos.

Los arkeologos ke kavzaron a ke se tope Troya son: Manfred Osman Korfmann, Carl Blegen, Wilhelm Dörpfeld i por siguro el famozo arkeologo Schliemann ke se rovo la mas parte de los presyozos artifaktos i oros, los izo fuyir al etranjero. Una chika parte de lo ke se topo se izo trayer atras a la Turkiya ma malorozamente lo muncho dainda se topa en el Muzeo de Berlin, en Hermitage Museo en St. Petersburg, en el Museo Pushkin.

Este viyaje muy bien reushido espero i kreyo ke se organizara kada anyo i ke muncha djente partisipara.

Munchas grasyas a los Çanakkalelis.

Al vermos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV Şalom Spotify'da GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental