No se si sosh enteresados en los pintores, fotografos o en todo modo de artes i kulturas. Mizmo si no sosh, no es posivle ke no oyitesh el nombre del famozo fotografo, İzzet Keribar. Los dias dalkavo estamos lavorando endjuntos para realizar un proyekto. I dos semanas antes me telefono dizyendo ke lo yamaron del Palasio del Prezidente de Turkiya dizyendole ke va ser onorado por el Prezidente de la Republika komo uno de los mas famozos fotografos. Devia de tomar un premio de Kultura.
Era syete anyos antes en el 2011 en Estanbol en la sala Lütfü Kırdar ke avia resivido este premio. I yo en este diya orozo de İzzet estava aya. I esta vez de ke oyi esto, le dishe ke kero vinir a Ankara. Me disho “no deves de avlar a dingunos. Porke no deklararon dainda.” I no avli. Lo dishe solo al prezidente de muestra komunidad porke deviya de organizarse para pueder vinir a Ankara. Kada vez ke un miembro de muestra komunidad es onorado/a por muestros governos, por muestros prezidentes o por diferentes payizes, kada vez syento la nesesidad de estar endjuntos kon eyos. Porke kreyo ke es una koza muy emportante para kada uno. I se pueden sintir solos!
Unos kuantos diyas despues, meldimos esta novedad en las gazetas. I embiyi la kopia de mi karta de identidad para resivir una envitasyon. I diya de myerkoles mos fuimos kon el prezidente, İzak İbrahimzadeh i muestro kapo redaktor İvo Molinas a Ankara i del aeroporto mos fuimos a la Sinagoga de Ankara; ke es una sinagoga malorozamente poka frekuentada. El prezidente İbrahimzadeh kada vez ke se va a Ankara aze su posivle para vijitar la sinagoga i para azer una kurta orasyon.
Esta vez enviti tres universitaryos ke tuve la posibilidad de konoserlos en Bandırma durante la Konferensia del Djudaismo i de Israel unos kuantos mezes antes. I aya tuvimos la posibilidad de diskutir kon estos akademikos syertos sujetos. Mizmo pensimos si syertas universitades ke se topan en Ankara si pueden azer syertos kursos en la sinagoga. Puedeser ke no es muy fasil de azer esta organizasyon. Ma puede dar vida a esta sinagoga.
Kuando arivimos al Palasyo del Prezidente – es por la primera vez ke m’estava indo aya - estava enkantado de ver estos edifisyos djigantes. Kuando entrimos adyentro i arivimos al kulis de la sala, un chiko grupo estava interpretando kantes de muzika klasika.
İzzet Keribar ke era uno de los envitados vino al palasyo kon su mujer, su ijo, su ija, su yerno i sus dos inyetos. Toda la burokrasiya i una grande parte de politikos, ombres de kultura se topavan en este salon de mas de kinyentas personas. Todos los ke resivyeron sus premios avlaron unos kuantos biervos. La diferensia de İzzet era su modestiya. Porke rengrasio su mujer Rozet i sus dos ayudantes ke lavoran kon el, sitando sus nombres.Despues de la seremoniya organizaron un kokteyl en el salon d’invyerno ande el prezidente no partisipo.
Kero felisitar el sinyor İzzet Keribar por su lavoro i lo kero felisitar porke es uno de los personajes emportantes ke dan onor a muestra komunidad kon sus lavoros i kon sus ovras.
