Shemini

Rav Yeuda ADONİ Köşe Yazısı
27 Mart 2019 Çarşamba

Kuando se termino el lavoro del tabernaklo, vyendo Moshe Rabenu, ke todo esta djusto sigun el komando del todo poderozo, amostro su kontentes i los bendisho. Sovre el komando del Kriyador, ordeno Moshe el miskhan el primer diya del mez Nisan de este anyo, i metyo kada koza en su orden. Las tavlas de la ley, ke estavan en su tyenda, las metyo dyentro el Aron Akodesh, ke izyeron de un palo de pino muy alavado nombrado ‘Shita’ i kuvyerto de oro por adyentro i por afuera, i lo kuvijo el aron akodesh kon el kaparet. Despues de azer todo lo ke enkomendo el sinyor de el mundo, se kuvijo el mishkan de una nuve. Esto fue un sinyal por el avenir. Ke dizde akel diya todo tyempo ke estava la nuve sovre el mishkan no se maneava el puevlo de onde estavan pozados. Kuando se alevantava la nuve, se levantavan el puevlo i se ivan kaminando asta ke pozava otra vez la nuve sovre el mishkan i pozavan i eyos.

Despues de esto, al ochen diya, lo yamo i lo nomino Moshe a Aaron servitor grande del Kriyador (Koen Gadol) delantre los savyos i el puevlo djudyo. Despues de azer Aaron Akohen la seremoniya de los sakrifisyos sigun le enkomendo Moshe, vyeron todo el puevlo lo onra del Todo Potente ke pozo sovre el mishkan delantre de todo el puevlo. Abasho fuego de los syelos sovre la ara - mizbeah ke kemo todos los sakrifisyos; todo el puevlo no tuvyeron el koraje de sostenersen en pyes i se abokaron sovre sus fases i alavaron al Kriyador por esta ovra maraviyoza ke amostro kon eyos. En medyo de esta santa alegriya, le afita a Aaron un dezastre manziozo; sus dos ijos Nadav i Aviu kijeron pasar sus limito i azer un sirvimyento al Kriyador sin ser otorizados. El Kriyador no estuvo kontente de esto, i muryeron ayi delantre. Aaron mostro akea ora su noble korason, i tomo el echo kon muncha pasensya sin pensar ni atristarse por nada syendo esto fue la veluntad del Kriyador.

La seremoniya de estrenomyente se termino kon los donos i sakrifisyos ke izyeron los dodje prezidentes de kada trivo. Enpesando de este diya, ayigaron un korban i trusheron mizmo dono un prezidente kada diya.

Siz de yorumunuzu yapın

Tüm Yorumları Görün