Aktividades Kulturales en Muestra Komunidad

Silvyo OVADYA Köşe Yazısı
25 Nisan 2019 Perşembe

En kuatro diyas vamos a ir a Andirne para el konserto de Yasmin Levy. Reelmente kada anyo este konserto es muy emportante para la administrasyon de muestra komunidad. Lo organizamos durante la Semana de las Fondasyones. Tres anyos kreo ke vamos a tener syertos problemes para eskojer la data porke esta data va ser durante el mez de Ramadan, i un poko kon la semana de Pesah. Ma para kada koza ay un remedyo. Estamos organizando este konserto kon el apoyo de syertas kompanyias komersyales. Los kero rengrasyar. No solo eyos. Ay mizmo syertas kompanyias ke mos estan ayudando en preparando las invitasyones o dandomos todo los platos, kupas, pirones, kuchiyos i kucharas. I los profesyonales estan azyendo sus echos kon un presyo rezonavle. No es muy kolay de transportar tanta koza. Los Edirnelis son tan interesados ke estamos mizmo organizando en la guerta un barkovizyon para pueder segir el konserto. Es muy interesante ke la majoriya de los partisipantes no son miembros de muestra komunidad.

El mizmo diya en el Muzeo tenemos la repetisyon del program ke fue efektuado en el “Festival de kontar Kuentos” en Judeo-Espanyol kon la traduksyon en turko. Espero ke los ke vijitan el muzeo van a estar kontentes en sigiendo esta aktividad ke reelmente fue apresiada en el Festival. Kon este spektakolo vamos a tener una mueva aktivitad para enrikeser muestra lingua: kontar konsejas i kuentos.

Vos kero akodrar ke la ekspozisyon de las “Megilas” de Purim puede ser vijitada fin al 13 del mez de mayo. Reelmente es una okazyon. No es muy posivle de topar mas de 60 megilas. La semana pasada el famozo fotografo İzzet Keribar fotografyo todas estas megilas. Agora devemos de dar karar si vamos azer un livro kon este materiel. Komo la djente se estan interesando en esta ekspozisyon mos estan demandando si pensamos de azer una ekspozisyon kon las Agadas de Pesah. En la istoria de los Djudios de Turkia i mizmo del Imperio Otomano munchas Agadas fueron publikadas. Es posivle mizmo de topar Agadas eskritas en letras ebreas, ma kuando se melda es en turko. Este modo de Agadas fueron publikadas en Azarbeydjan. Kreo ke devemos demandar a los Muzeos Djudios i resivir estas Agadas un anyo despues. El primer dover es a Nisya, muestra kuratora i direktrisa de resolver esto. Si empesamos a realizar ekspozisyones asemejantes vamos a pueder valorizar muestras valores relijiozas.

Para eskapar mi artikolo de esta semana vos va kontar lo ke reushi a merkar diya de alhad en una vendidad de dokumentos (Efimera Müzayedesi). Una karta del djudio Jack Karditi ke fue nomado en los trenos del oryente komo soldado en el anyo 1915. I este dokumento mos amostra ke los djudios tomaron rolo en la Primera Gerra Mondial, en la Gerra de los Balkanes i en la Gerra de la Salvasyon.

 

 

Siz de yorumunuzu yapın

Tüm Yorumları Görün