KORAH

Rav Yeuda ADONİ Köşe Yazısı
3 Temmuz 2019 Çarşamba

Despues del pasaje de los Meragelim ke ya les kito Moshe Rabenu la espernasa de entrar a la tyerra bendicha, i ya les avizo la desizyon del Todo Poderozo ke todo el puevlo deven murir en el dizyerto, se aflosho sus amistad kon el i vinyeron asta pensar ke no kale sintir sus palavras ni ovedeser a su ordenes i es en este tyempo ke se permete un syerto nombrado Korah de la famiya de Levi, a salir a kontradizir Moshe Rabenu.

Korah, toma kon el a Daton i Aviram, sus amigos de la famiya de Reuven i munchos personajes del resto de puevlo, i un syerto ijo de Pelet, i se aze una konpanyia de 250 personas. Todos grandes personajes de ombres afamados de entre el puevlo se paran kon altigez delantre de Moshe i Aaron i toman a brajar kon Moshe Rabenu i azer abandonar todos sus ordenes.

Eyos toman a kontradizirle sovre 3 puntos muy enportantes. Prima por lo ke nomino a su ermano, Aaron por grande sirvidor del Kriyador (Koen Gadol) a el i a sus ijos i defendyo ke ningun ajeno ke kere ke seya, puedra aserkarse de esta ovra.

Segundo, porke aparto el trivo de los Leviyim por sirvidores del santuvaryo en lugar ke este sirvisyo ke aparteniya asta estonses a los behorot, de kualunke trivo ke fuera. I tresera por lo ke se determino de dar la preferensya al trivo de Yeuda, el lugar ke aparteniya a Reuven ke era el primero de los dodje trivos. Sigun el orden del Dyo el trivo de Yeuda pasava delantre de todos los trivos.

En todas las oras, sovre estos puntos i sovre el mal selo ke tuvo Korah, ke el keriya ser el Koen Gadol, se peleyan kon Moshe Rabenu porke tyene ke senyorearse sovre el puevlo del Dyo i meter ordenes sigun su pareser.

Moshe Rabenu, entendyendo sus malos penseryos ke estan pensando ke todas estas ovras son echas a su pareser i no es por komando del Dyo alto, no tuvo el koraje de kontradizirles akel momento porke ne se reboltaran mas negro. Les dize kon palavras tyernas ke aproven i ke agan manyana, el servisyo del ketoret ke es el saumeryo en el templo, el i Aaaron, i veran ken es el santo ke el Kriyador eskojo en el, eyos o Aaron? Vyendo Moshe Rabenu ke estas tyernas palavras no izyeron ningun efeto sovre Korah i sus konpanyeros, enpeso a avlarles kon fortaleza syendo ke sus penseryo no es mas ke por vinir kontra el Kriyador i mando a yamar a Datan i Aviram ke estavan en sus tyendas por darles a entender sus yerro puedeser se repyentaron. Ma eyos no kijeron sintir. El Dyo Santo ordena a Moshe Rabenu ke se aparte de esta konpanyia i les amostre en un momento una fuerte mortaldad en el puevlo.

Moshe Rabenu roga a el Kriyador a ke balde esta mortaldad i ke abate su ravya.

 

 

Siz de yorumunuzu yapın

Tüm Yorumları Görün