Kuando eskucharesh a la boz de Ad… tu Dyo, para guadrar sus enkomendansas, i sus fueros eskritos en este livro de la ley, kuando tornaras a Ad... tu Dyo kon todo tu korason i kon toda tu alma. Estos pesukim enteresantes meldamos en las perashiyot de esta semanana.
Ansi dize el savyo Hafets Hayim en su livro Torat abayit solamente kuando nos vamos a enforteser por tornar a Dyos kon todo muestro korason vamos a tener el merito de afirmar las enkomendansas de la Tora. El ovligo de tornar en teshuva, sovre todo en el mez de elul, ke mos topamos, tambien ke estamos aserkandomos a el anyo nuevo ya es savido por todos ke devemos de apresurar a deshar nuestras echas non buenas. Ma malorozamente el yetser ara el apetite malo de la persona le mete delantre del ombre entronpesos i no lo desha pensar a enderechar su kamino non derecho. Malgrado todo esto, si viniya una profeta i nos diziya: Mirad: Ke vash a salir kulpozos en el djuzgo, enfrente del Shem Yitbarah, estamos siguros ke de vista tornavamos en teshuva. Es bien porke esperamos al profeta ke venga a korijarmos, ya estamos muy siguros ke ninguna persona no esta korekta verso el Kriyador. La repuesta ke pensamos a dar entre nozotros sera ke no tenemos tyempo de pensar, ma tenemos la esperansa ke un diya vamos a despertar a muestros korasones i aserkarmos a el Shem Yitbarah.
Sovre este pensamyento semejante, disheron muestros savyos en los perakim: Sino agora ke esto bivo ke devo azer, kuando? I tambien dizen muestos savyos en Pirke Avot: no digas kuando va tener tyempo vo estudyar, es posivle ke no tendras tyempo. Kuantos Yom Akipurim pasimos ke rogimos a el Todo Potente, vidas largas kon sanedad a mozotros a muestras famiyas, despertimos muestros korasones por enderechar muestras echas es ke fuimos senseros en muestras desizyones? Si es ansi komo nos permetimos mosotros mismo ke a el avenir vamos a enderechar muestras echas?
Dunke devemos venser a el yetser ara, a el apetite malo, i aserkarmos a el yetser atov, a el apetite bueno despartar muestras korasones i tornar en teshuva kon todo muestro korason i kon toda nuestra alma komo esta eskrito en la perasha de esta semana “Ki tashuv el Ad… elokeha behol levaveha uvhol nafsheha”. Porke vas a tornar a Ad … tu Dyo kon todo tu korason i kon toda tu alma. Devemos de pensar kualos son los enkonvenyentes ke no estan deranjando a ser korektos enfrente de Dyos i la djente. Se deve la persona de tirarse i anular estos enkonvenyentes. De darse un orden en su vida.
Tambien kontinua en la Tora, en el paragrafo de la perasha Nitsavim: Porke esta enkomendansa, ke yo te enkomendo oy no es enkuvyerto de ti, ni esta leshos. No esta en los syelos ke es muy difisil de alkansarlo ni en el bodre de la mar ke es difisil di pueder toparle sino ke esta muy serka de ti en tu boka i en tu korason estos todos biervos es por la Teshuva ke fueron denusyados. El Shem Yitbarah ama la djustisya, el dezea la teshuva ke vamos a azer mozotros. El esprito de la teshuva esta muy bien explikado en Pirke Avot: Rabi Tarfon dizia: El diya (La vida) es kurto, el lavoro es muncho, los lavorantes neglijan i la paga es grande, i el patron (el Kriyador) demanda kuento.
Tendremos merito de deshar nuestros defektos i entrar a el anyo nuevo kon meresimyentos i ke enpese el anyo nuevo kon sus bendisyones. TAHEL SHANA UVORHOTEA – SHANA TOVA UMTUKA.
