1 Mart 2021 Pazartesi 22:21
vakko
vakko

Lo ke afita en el mundo

Silvyo OVADYA Köşe Yazısı
30 Ekim 2019 Çarşamba

Ay muncho tyempo ke no esto eskrivyendo artikolos politikos. Estamos bivyendo en un mundo, mizmo en una parte del mundo ande no vemos la pas i kada diya bivimos un evenimyento, todo modo de evenimyentos: atakes teroristos, gerras, matansinas, bombas i todo modo de desgrasyas.

No se si lo savesh, los anyos dalkavo muestro payis, la Turkiya fue ovligado de achetar serka de tres milyones i medyo de refujyados Siryanos ke se fuyeron de las gerras. Es djusto ke una partida tornan a sus payises durante las fyestas relijiozas i tornan atras unos kuantos mezes despues. De ke los achetan no esto entendyendo. Si se pueden kedar tres o kuatro mezes en sus payises, ya puedemos pensar ke la situasyon no esta tan negra para estas personas. Ke izyeron los Almanes?

No los acheto kuando tornaron tres mezes despues i les disheron “Si puedesh bivir tres mezes no tenesh de menester de la Alemanya, puedesh tornar a vuestro payis.”

Este mes bivimos una gerra entre la armada Turka i las chetas Kurdes ke se topan en el norte de la Siria. Uno o dos anyos antes los Amerikanos los protejo, los dyo miles de kamyones de armas. Ma despues el Sinyor Trump troko de karar, i disho ke no tyene nada de azer en estas tyerras i disho al Prezidente turko Erdoğan ke el es responsavle de los teroristos del ISHID. En las prizyones avian serka de 900 teroristos. Los Amerikanos tomaron unos kuantos entre eyos. Eran los mas salvajes. I despues los Kurdes se inyervaron; las chetas Kurdes  desharon todos los teroristos del ISHID. La armada Turka alkanso a apanyar serka de 300 entre eyos. Esto es reelmente un malor para muestro payis. I el solo lugar ke estos teroristos se pueden irsen es la Turkiya. Malorozamente la Fransia, la Belchika o la Inglatierya no son meraklis para tomar sus sivdadinos, djuzgarlos i meterlos vente/trenta anyos al prezo. Porke no keren estos teroristos.

La Turkiya izo esta gerra para liberar un tereno bastante ancho i pueder azer retornar a lo manko un milyon i medyo o dos milyones de refujyados. I sin una pyedrita emportante apanyo una situasyon superyora i pudo asentarse en primero kon los Amerikanos, i despues kon los Rusos para ser una fuersa emportante en esta rejion. Kreo ke es por la primera vez en su istoria ke la Turkiya topo una situasyon tan fuerte. I kreo ke van a reushir kon los Rusos i kon los Siryanos a azer tornar en sus payizes una populasyon emportante de refujyados.

Diya de alhad kuando estava eskrivyendo este artikolo en supito en la televizyon el Prezidente Amerikano estava kontando komo mataron el lider de los teroristos de ISHID en Irak. El teroristo ke se yama Bagdadi. Los anyos dalkavo los Amerikanos despues de Usame bin Ladin reusheron a matar un segundo lider teroristo. Ma malorozamente esto no va ser la fin de los teroristos. Un otro va salir en medio, i kon el va ser la mizma koza.

Oguramos pas en muestro payis, pas en muestra rejyon i pas en el mundo entero.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİNİZİ ÇEKEBİLİR

GZ

MOZOTROS AİLESİ

MOZOTROS AİLESİ

TÜNELİN UCU

TÜNELİN UCU