Ke diya de Alhad (2)

Silvyo OVADYA Köşe Yazısı
26 Şubat 2020 Çarşamba

La semana pasada vos konti sovre dos kozas ke bivimos Alhad el 16 Febrero. Oy kreo ke vos va kontar sovre otros dos sujetos. En primero kero rengrasyar İzzet Bana por sus esforsos ke esta azyendo estos kinze anyos dalkavo para ambezar un poko esta lingua i munchas de muestras kantikas a las kreyaturas. A la fin del konsyerto me alavo bastante. Ya se ke ayudi las Estreyikas del fon de Yaşar Paker (Albukrek) ke desho sus paras a una asosyasyon ande fundaron un fon para la muzika. I les propozi de ayudar a İzzet Bana kon las Estreyikas. Ya me avia mizmo olvidado, ma İzzet no se olvida i me rengrasyo delantre de todos. Se topa muy poka djente komo İzzet ke tyene una pasensya i el koraje para ambezar a tantas kreaturas muestrras kantikas i muestra kultura. No me plaze muncho plaketas ma en el Diya Internasyonal del Ladino dar una plaketa a İzzet de la parte del Sentro Sefaradi d’Estanbol era un dover para mozotros. No troko nada en la vida de İzzet, ma kreo ke vido la emportansa i la valor ke le damos.

   Estamos lavorando para realizar su CD i DVD. I keremos organisar un konsyerto en el Neve Şalom despues ke su CD + DVD va ser realisado. Meresen este konsyerto. Durante el konsyerto kantaron i mostraron syertos djugos ke se djugava mizmo en mi chikes. El mizmo diya Anna, Şeli i Süzet en sus parodiya avlaron bastante de sus chikes i desveloparon sus parodias avlando i djugando los djugos de sus chikes. Ya se ke es muy enteresante esto todo. La vida esta trokando i mizmo los djugos de las kreaturas. No vesh mas ijikas djugando seksek, o ijikos djugando kon las bilyas. Yo no pude djugar en las kayes en Şişli. Aviya kreaturas ke djugavan, ma mis paryentes no me deshavan. Era kreo “hanımevladı”. Mi granpapa ke morava en Paris me embiyava bilyas  klaras i ermozas. Un diya di karar i en la kaye empesi a djugar bilyas. I piedri unas kuantas bilyas. Despues kuando torni a kaza konti a mi ermana i a mi madre. Mi ermana tres anyos mas grande ke mi no pudo rezistir. I disho, “Tu no saves djugar; te enganyaron”. I salyo a la kaye i topo los ijikos ke ganaron. I les disho, “Lo enganyatesh! Deke tomatesh sus bilyas, las devesh de dar atras immediatamente”. I se espantaron, i dyeron las bilyas atras. Este modo las salvi las bilyas ke mi granpapa me enbiyava aryentro del paketo de kafe ke mos embiyava kada mes o kada dos mezes. Oy el segundo sujeto era de tratar el teatro, ma esto vyendo ke no me kedo mas muncho lugar para esto. I va eskapar mi artikolo kon la parodiya de Anna, Şeli i Süzet. Ya devo de konfesar ke no tuve el mazal de segir toda esta parodiya porke kon la propozisyon de Henri ariva aviya una meza ande resivimos la djente. I dingunos no kijeron kedar aya. Ma lo oyimos. Komo no tenemos un grupo ancho de dirijentes tenemos problemes de vez en kuando. Henri disho ke se deve okuparse de los “prompteres”. Ya se ke estash demandando a vuestro maridos / mujeres mizmo kreyaturas kualo es este prompter. Ya vesh en la televizyon ke el Presidente de la Republika esta avlando sin mirar a un papel i sin tener notas. No se si lo savesh; ay un enstrumento ke se yama “prompter” i ay syertas personas ke se okupan de politika i emplean este instrumento para pueder meldar sin papel. En todas las dos vandas se topa un  instrumento ande el teksto esta eskrito i no se ve de enfrente. Ay syertas personas komo Süzet Herman ke se ambezan de kavesa meldando unas kuantas vezes i syertas/os ke no pueden komo mi, mizmo si lo meldan sinkuenta vezes. Ya se lo ke travi en la sietena klasa! Deviyamos de ambezarmos una fabla de La Fontaine kada martes ma era muy difisil para mi de ambezarme de kavesa esta fabla.

   Para esto alkilimos un prompter i todas estavan muy orozas porke no deviyan de ambezarsen. Es por esto ke Anna estava muy kontente i estava saltando kon la kuedra en la mano. No deviya de pensar lo ke deviya de avlar dos puntos despues. Ay anyos ke aparejan una parodiya. I kada anyo un muevo sujeto. I kada anyo a mi opinion realizan maraviyozamente esta parodiya. Kero terminar mi artikolo rengrasyando Süzet, Şeli i Anna. Grasiyas a las tres por sus esforsos.

 

 

 

 

 

 

Siz de yorumunuzu yapın

Tüm Yorumları Görün