7 Mart 2021 Pazar 11:11
vakko
vakko

El Virus de Corona

Silvyo OVADYA Köşe Yazısı
4 Mart 2020 Çarşamba

Ay dos mezes ke el mundo esta en un estado muy perikolozo. En la China este virus fue la razon de miles de muertos. Despues de la Coronavirus la China ke eksporta serka de 14 o 15 milyardas de dolares, este anyo reusho a eksportar solo dyes por syen de este montante en el mez de enero. I kreo ke no va ser muy diferente en febrero. Ke desgrasya. Un payis de 1,4 milyares de personas. No es posivle de kontar esta kantidad de personas. Si esta situasyon kontinua unos kuantos mezes mas, va ser una desgrasya para los Chinesos i para la umanidad.

La semana pasada teniyamos una ekspozisyon de ilos en Estanbol. Oy en diya kreo ke es una de las mas emportantes ekspozisyones en este sektor. I kale saver ke la Turkiya es un payiz muy emportante en este kampo. Komo mozotros los Turkos semos bastante korajozos, no anulamos una ekspozisyon. Ya se ke un amigo partisipo los mizmos diyas a una ekspozisyon de vizyon i de bozes. I eyos no toparon el koraje de anularla.

Ya savesh lo ke ize? El primer diya antes de irme en un papel eskrivi: “Ya se ke va impedir la propajasyon; ma no vos bezesh i no vos tomesh la mano”; i kuando no estava dando la mano al kliente me estava demandando “kualo keria dizir” i les estava amostrando lo ke estava eskrito. I despuıes entendyeron. Es vedra ke di la mano a lo manko a sinkuenta personas. Ma puediya dar a syen i sinkuenta!

I estos tres diyas en las konversasyones se avlo solo de esto i de lo ke va afitar. El primer diya aviya munchos Rusos, Litvanyanos i otros industriyales de este modo de payises. Komo merkavan el materyel prinsipal para sus produksyones de la China, estavan bushkando kualo pueden merkar de la Turkiya para pueder kontinuar sus produksyones. La mizma koza para muestro payis. Disheron ke va ser imposivle de pintar ilos o ropas porke todo modo de materyal kimika tyenen un raporto kon la China i estan dizyendo ke en la Turkiya tenemos la posibilidad de pintar ropas o ilos solo los dos mezes ke vienen. Si la China no empesa a eksportar el materyel nesesaryo, no tenemos mas la posibilidad para pintar. Ke desgrasya.

Oy estamos kontentes mozotros los Turkos porke pensamos ke una grande partida de los Evropeos empesaron a vinir a muestro payis i estan pasando komandas porke no son siguros ke la China les va dar lo ke tyenen de menester. I se estan espantando porke no pueden embiyar sus lavorantes a la China para ke kontrolen las ropas ke se estan preparando en las makinas.

Ay fabrikas ke merkaron makinas de los Almanes ke se estan produsiendo en la China. I malorozamente mizmo si pagaron la makina no pueden resivirla. Mizmo si la resivyeron ay dos mezes ke estan asperando el montör ke va estableserla. Reelmente dingunos no pensavan los malores de este anyo.

Trump i los Amerikanos izyeron la gerra virtual kon la China para redusir su ekonomiya. No se si son los Amerikanos ke kavzaron esta epidemiya. Ay syertas personas ke pensan de esta manera. Ma si es este modo me esto espantando ke los Chinezos se van a vengar de mala manera!

Espero ke el mundo va topar el kamino derecho i ke no van a deshar ke sus barvas keden entre las manos de los Chinezos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİNİZİ ÇEKEBİLİR