El Virus de Corona (3)

Silvyo OVADYA Köşe Yazısı
18 Mart 2020 Çarşamba

La semana pasada deviya de eskrivir dos artikolos. El primer para el Amaneser i el segundo para el Şalom. Kuando eskrivi mi artikolo sovre Erol Güney i el filmo sovre el kon tantas fotos i avlando kon Karen dimos karar de meter akel artikolo en El Amaneser. I mi artikolo del Şalom era intitulado “El Virus de Corona”. Ay tantos haberes i esta semana malorozamente esta enteresando el mundo entero.

   Esto resivyendo a lo manko syen whatsappes o mailes kada diye sovre este sujeto. Esta dando  savor de kalavasa.

   Un ombre Italyano esta eskrivyendo “Me parese ke mos vamos a salvar de la Corona, ma esto siguro ke mos vamos a kitar kon mi mujer”. Kreo ke tyene una mujer muy pezgada i ke aze atansyon a todo modo de kozas para no ser atakados por este Virus; i diya entero estan dikbidik. Los Italyanos komo no keren estar en kaza en primero salyeron a las kayes a kantar, baylar, frekuentar amigos, bezos i chupos … I estan agora en las kazas en prezo. I agora kada diya 250 personas se estan muryendo. Ke desgrasya.

En el whatsapp ay videos ande toda la maalle en Italia estan kantando por los balkones i por las ventanas tanyando instrumentos muzikales. Son djente alegre.

Las personas ke viyajan lo mas muncho en el mundo kreo ke son los Israelyanos. Es por esto ke azen echos importantes. Ma esta vez, no kamino. Diya de alhad aviya 55.000 personas ke estavan en kaza en karantina. Si viyajan tanto esto es el resultado. Estan dizyendo ke la transportasyon publika no va lavorar de martes a delantre; i no se va emplear moneda. Kale ir a Israel para no gastar!

Tornando a muestro payis. Sovre los ministros no aviya kavzos ma despues ke la Banka Mundial disho ke va dar 50 milyones o milyardas para este problem el ministro de Sanedad disho ke ay un kavzo. Despues kon los miembros de la famiya suvyo a 5. I agora ay miles i miles de djente (un total de sinkuenta mil) ke tornan de Umre (es un dover de los Musulmanos ke vijitan los lugares sakrados en la Saudia Arabia). I kon los primeros ke tornaron apanyaron una mujer kon Corona. Kuando el ministro anunsyo esto, toda la djente empesaron a ir a los super merkados. A la demanyana en la radio estavan dizyendo ke el Virus no bive en 62 grado de alkol. Telefoni a İzak i le dishe vate al Metro i merka 7-8 bokales de kolonya de limon para los ke lavoran en la fabrika. I los merko. Un diya despues ve ke empesaron a eskapar lo ke aviya merkado. Telefoni aya i a otros lugares. “No egziste mas kolonyas en Estanbol”. Estamos topando muy difisil. Oy es el diya de los kolonyadjis. El mizmo diya a la noche todas las famiyas koryeron a los supermerkados i empesaron a merkar makarones, lentejas, garvansos, avas, arros i todo modo de kozas. Savesh lo ke es enteresante? Toda la djente estan merkando papel de tualet. Esto merekiyozo! De ke papel tualet? Kon el Virus de Corona pensan ke van a irsen sinko o sesh vezes a la privada?  Diya de alhad me fui al Migros Şok komo kada semana para merkar lo ke tyene de menester mi madre. I veo ke en el reyon de papeles tualet no egziste ni un paketo. Los Estanbollis komo son haraganos ay unos kuantos servises komo “GETİR” (trayeme) i un amigo demando al ke les trusho la komanda “Komo estan los echos?” Le respondyo, “agora deviya de yevar a un kliyente papel tualet para 1.500 liras.” Kreo ke merko este kliente el papel para dos anyos.

Va eskapar mi artikolo demandandovos komo devo de responder kuando me demandan “Te vas a ir amanyano al echo?” o “ Estash lavorando en la fabrika?”. No topo de dar una repuesta! Ken va pagar la mezada de 130 personas a la fin del mez? Si no lavoramos es muy difisil de pagar todo lo ke pagamos kada mez.

Yo no so negativo. Esto asperando ke todo se va amijorarse i enderecharse.

 

 

 

Siz de yorumunuzu yapın

Tüm Yorumları Görün